"Humo" bosh murabbiyi kechagi mag'lubiyat sabablarini izholadi

Xabar berganimizdek, kecha oqshom "Humo" Oliy xokkey ligasining navbatdagi turida Moskva viloyatining "Ximik" klubi mehmoni bo'lib, 2:4 hisobida imkoniyatni boy bergan edi. Uchrashuvdan so'ng o'tkazilgan matbuot anjumanida "Humo" ustozi savollarga javob berdi. 

- "Ximik"ni g'alaba bilan tabriklayman, - deya so'z boshladi E.Popixin. - O'yinni juda yaxshi boshlagan edik. Lekin ketma-ket ikkita juda qulay, golga tortadigan vaziyatda Voroninga sovuqqonlik etishmadi. Ikkita vaziyat ko'kka sovurildi. Natijada xokkeyning oltin qoidasi ishga tushdi. Mezbonlar ketma-ket uch bor darvozamizni ishg'ol qilishdi. Yaxshiyam uchta goldan keyin "sochilib" ketmadik. Yigitlar xarakter ko'rsatishga urinishdi. Birinchi javob shaybasi kiritildi. Ikkinchi bo'limda ustunlikka erishdik. Ammo, vaziyatlardan foydalanish bugungi o'yinda "nol"ga teng bo'ldi. Yacenkoning o'zi ikkita yuz foizlik imkoniyatdan foydalana olmadi. O'tkazib yuborilgan to'rtinchi shayba esa bizni "dafn" etdi.   

- "Humo" keyingi o'yinlarini "Zvezda", "Tambov", "Buran" va "Rostov"ga qarshi o'tkazadi. Bo'lajak safar o'yinlaridan nima kutyapsiz?

- Biz har bir o'yinga alohida tayyorgarlik ko'ramiz. Hozir pley-off uchun kurash ketyapti. Bu esa oxirigacha davom etadi. Har bir o'yinda xuddi oxirgi final uchrashuviga chiqqandek harakat qilishimiz shart. Bunday muhim o'yinlarda etakchilar, tajribali xokkeychilar katta masuliyatni o'zlariga olishlari kerak. Bu o'yinchilar biz murabbiylarga ko'makchi bo'lishlari lozim. Siz sanab o'tgan klublarga qarshi kechadigan o'yinlarimizning natijasi etakchilarimizning harakati va o'yiniga bog'liq bo'ladi. 

- Birinchi bo'lim so'nggida darvozabon almashtirildi. Bu sizning qaroringizmi? 

- Ha, kimni almashtirishni men hal qilaman. Lekin bu almashtirilish Smiryagin yomon o'ynagani uchun amalga oshirildi degani emas. Uchchala golda ham darvozabonni to'liq ayblamagan bo'lardim. Himoyachilar raqib xokkeychilariga zarba yo'llash uchun qo'yib berishdi. 

- "Zvezda" klubidan Lozebnikov "Humo" safiga kelib qo'shildi. Keyingi o'yinda uni ko'ramizmi?

- Bilmadim. Oldin bugungi o'yinni muhokama qilib olishimiz kerak. U o'yinga tayyor.