"Humo" ilk o'yindagi mag'lubiyat uchun "Aktobe"dan revansh oldi

"Qanotlilar" kecha oqshom "Humo Arena"da "Aktobe" klubini qabul qilib, 3:2 hisobida g'alaba qozonishdi. Bu bilan birinchi o'yindagi mag'lubiyat uchun revansh ham olindi. Muz egalari safida Vasiliy Jilov, Egor Buyalskiy va Aleksandr Derbenev kiritilgan shaybalarga mualliflik qilishdi. 

"Humo" kechagi g'alabadan so'ng turnir jadvalida 23 ochko bilan 5-o'ringa ko'tarilib oldi. "Aktobe" 16 ochko bilan 9-pog'onadan joy olgan. Endi "Humo" navbatdagi ikki uchrashuvni ham o'z muxlislari ko'z o'ngida o'tkazadi. Jamoamiz 27 va 26 noyabr kunlari "Humo Arena"da chempionat peshqadami Ust-Kamenogorskning "Torpedo" klubi bilan hisob-kitob qilishadi.