"Humo" so'nggi uy uchrashuvida muhim g'alabaga erishdi

Bu safar xokkeychilarimizga Tverning "Dinamo" jamoasi raqiblik qildi. Gollarga boy bo'lgan o'yinda darvozalarga jami 9 ta shayba kiritildi. Uchrashuvni 0:2 hisobida boy berayotgan "Humo" xokkeychilari yakunda irodali g'alabaga erishishdi - 5:4. 

Bugun "Humo" safida kiritilgan gollarga Aleksandr SHerbina, Aleksey Pepelyaev, Platon Popov va jamoa dirijyori Mixail Anisin mualliflik qildi. SHerbina dublga erishdi. 

Bugun "Humo Arena"ga mavsumdagi eng ko'p muxlis tashrif buyurdi. O'yin yakunlanishi bilan muxlislar o'zlari bilan birga olib kelgan yumshoq o'yinchoqlarni muzga uloqtirishdi. O'yinchoqlar va bugungi o'yin chiptalari sotuvidan tushgan mablag' to'laligicha hasta bolakaylarga sovg'a qilinadi. 

Malumot uchun, "Humo" keyingi uchta o'yinni safarda o'tkazadi. Evgeniy Popixin shogirdlari endi "Humo Arena"da pley-off bosqichidagi uy uchrashuvlarini o'tkazishlari mumkin bo'ladi.