"Humo"ning navbatdagi uy o'yinlari seriyasi boshlanmoqda. Qozog'iston klublari Toshkentda mehmon

Toshkentliklar chempionatdagi 39 o'yindan so'ng "Konferenciya 1"da 7-o'rinni egallab turibdilar. Bu esa pley-off bosqichida kurashni davom ettirish uchun etarli. Yangi yilning dastlabki to'rtta o'yini turnir jadvalidagi o'rinlarni yaxshilab olish uchun yaxshigina imkoniyatdir. 

Yangi yil oldidan "Humo" KXLning "Sibir" jamoasi bilan hamkorlik borasida kelishuvga erishdi. Novosibirskdan serquyosh O'zbekistonga ikki nafar mahoratli xokkeychi tashrif buyurishi mumkin. SHuningdek, yaqinda "Humo"ni tark etgan darvozabon Pavel Nechistovsk o'rniga ham yangi darvozabonni ko'rib qolishimiz mumkin. Toshkentliklar tarkibida betakror Roman Smiryagin bor. U yaqindagina VXL doirasida hafta darvozaboni unvoniga sazovor bo'ldi. Ammo, pley-offda ishtirok etishni maqsad qilgan jamoaga ikki nafar yaxshi darvozabon kerak bo'ladi. 

Ertaga "Humo Arena"ga tashrif buyuradigan muxlislarni nima kutmoqda? Malumki, har bir o'yin oldidan arenaga faxriy mehmonlar tashrif buyurishadi. Bu safar esa "Humo"da Sabina Mustaeva mehmon bo'ladi. 

7 yanvar kuni esa tadbirlar "Humo. Bolalar" shiori ostida tashkil etiladi. Harbiy orkestr ishtirokida davlat madhiyasini eshitishga nima deysiz? Sovg'alar, tanlovlar va syurprizlargachi?

"Humo Arena"da yaqin orada bo'ladigan o'yinlar:

5 yanvar, yakshanba, 17:00: "Humo" - "Metallurg" (Novokuzneck)

7 yanvar, seshanba, 19:30: "Humo" - "Torpedo (Ust-Kamenogorsk)

9 yanvar, payshanba, 19:30: "Humo" - "Nomad" (Nur-Sulton)

11 yanvar, shanba, 17:00: "Humo" - "Sariaka" (Karaganda). 

Qishki tatil davomida "Humo Arena"ga tashrif buyuring va haqiqiy xokkey bayramiga guvoh bo'ling!