Humoyun Sultonov CHandigarh turniri bosh sovrini uchun kortga chiqadi

Mukofot jamg'armasi 15 000 dollarni tashkil etuvchi ushbu turnirda hamyurtimiz Humoyun Sultonov ham o'z imkoniyatini sinovdan o'tkazyapti. Mamlakatimizning birinchi raketkasi biroz avval yakuniga etgan 1/2 final bahsida ortiqcha qiyinchiliksiz g'alabaga erishib, musobaqaning hal qiluvchi final uchrashuviga yo'l oldi. 

CHandigarh turnirida birinchi raqam ostida tasniflangan Sultonov final ostonasida musobaqaning uchinchi raketkasi, hindistonlik Mukund Sasikumarni 6/2, 6/1 hisobida mag'lubiyatga uchratdi. Humoyun uchrashuv davomida 11, Mukund esa 4 ta eys zarbasini amalga oshirgan.  

Ertaga Humoyun CHandigarh turniri bosh sovrini uchun yana bir mezbon tennischi Ramkumar Ramanatanga qarshi kortga chiqadi. Turnirning ikkinchi raketkasi hisoblangan Ramkumar bugun 1/2 finalda musobaqada to'rtinchi raqam ostida harakat qilgan vetnamlik Nam Xoang Lidan 6/3, 6/2 hisobida ustun keldi.    

Taqqoslash uchun, Humoyun Sultonov ATP reytingida 331, Sasikumar 427, Ramanatan esa 410-pog'onadan joy olgan.