Humoyun Sultonov Kalaburagida 1/2 final ishtirokchisiga aylandi

Mukofot jamg'armasi 25 000 AQSH dollarini tashkil qiluvchi turnirda hamyurtimiz Humoyun Sultonov ham muvaffaqiyatli odimlayapti. Mamlakatimizning birinchi raketkasi M25 toifasiga kiruvchi ushbu turnirda ham birinchi raqam ostida saralangan. 

Biroz avval yakuniga etgan 1/4 final uchrashuvida Sultonov ortiqcha qiyinchiliksiz g'alabaga erishdi. U 77 daqiqa davom etgan bahsda turnirning sakkizinchi raketkasi rossiyalik 19 yoshli Maksim Jukovni 6/2, 6/3 hisobida taslim etdi. 

Taqqoslash uchun, Sultonov ATP reytingida 230, Jukov esa 738-pog'onani band etgan. Bu tennischilarning o'zaro o'tkazgan ilk uchrashuvi bo'ldi. Ertaga Humoyun final chiptasi uchun hindistonlik Dev Javiyaga qarshi kortga chiqadi. Dev turnirda ettinchi raqam ostida tasniflangan bo'lib, bugun 1/4 finalda vatandoshi Sidhart Ravatning kortga chiqmagani bois, kurashsiz yarim final ishtirokchisiga aylandi.