Humoyun Sultonov Kalaburagida muvaffaqiyatli start oldi

Mukofot jamg'armasi 25 000 AQSH dollarini tashkil qiluvchi turnirda hamyurtimiz Humoyun Sultonov ham o'z mahoratini namoyish etyapti. Mamlakatimizning birinchi raketkasi M25 toifasiga kiruvchi ushbu turnirda birinchi raqam ostida saralangan. 

Sultonov ilk davra uchrashuvida hindistonlik Vishu Vardanga qarshi kortga chiqdi. Biroz avval yakuniga etgan bahsda Humoyun birinchi setda jiddiy qarshilikka duch keldi. Bahs taqdiri tay-brekda hal bo'ldi. Ikkinchi setda esa tennischimiz raqibini deyarli sezmadi. Bir yuz bir daqiqa davom etgan uchrashuvda vakilimiz 7/6(6), 6/1 hisobida zafar quchdi.   

Taqqoslash uchun, Sultonov ATP reytingida 230, Vardan 1165-pog'onadan joy olgan. Ertaga Humoyun 1/8 finalda yana bir hind tennischisi Srinivasan Kodanchaga qarshi kortga chiqadi. Srinivisan reytingning 1781-pog'onasini band etgan.