Ikki Nodirbek hamda Javohir European Chess Club Cup musobaqasida muvaffaqiyatli o'ynashyapti

Erkaklar o'rtasidagi European Chess Club Cup musobaqasi o'z tarixida 39, ayollar ishtirokidagisi esa 28-marotaba o'tkazilyapti. Bu yilgi qita kubogida uch nafar grossmeysterimiz Evropa klublari tarkibida sovrinli o'rinlar uchun dona surmoqda. 

Grossmeysterlarimiz Nodirbek Abdusattorov va Javohir Sindarov Ruminiyaning "SuperChess", Nodirbek Yakubboev esa Sloveniyaning "TAJFUN-ŠK Ljubljana" jamoalari sharafini muvaffaqiyatli himoya qilishyapti. 

Kecha 4-turda Nobirbek Abdusattorov va Javohir Sindarov o'ynayotgan "SuperChess" klubi Turkiyaning "Turkish Airlines" jamoasiga 2:4 hisobida imkoniyatni boy berib qo'ydi. Abdusattorov eronlik Parham Maqsudluuni mag'lub etishni uddaladi. Sindarov esa Ediz Gurel bilan durang o'ynadi. Ikki hind grossmeysterlari Gukesh va Praggnanandhaning mag'lubiyati esa "SuperChess" jamoasiga qimmatga tushdi. 

Nodirbek Yakubboevning "TAJFUN-ŠK Ljubljana" jamoasi 4-turda peshqadam "Alkaloid" (Makedoniya) klubiga 2,5:3,5 hisobida yutqazdi. Yakubboev dunyoning sakkizinchi raqamli shaxmatchisi bo'lib turgan xitoylik Vey Yini mag'lubiyatga uchratib, kichik shov-shuv sababchisiga aylandi.  

Beshinchi tur oldidan Makedoniyaning "Alkaloid" jamoasi musobaqada peshqadamlik qilyapti. "Turkish Airlines" jamoasi qo'shimcha ko'rsatkichlarga ko'ra turnir jadvalida 2-o'rinni egallab turibdi. Yana ikki klub - Tuxera Aquaprofit Nagykanizsai Sakk Klub (Vengriya) va Novy Bor Chess Club (CHexiya) ham 4 ta turda yuz foizlik natija qayd etgan. 

"TAJFUN-ŠK Ljubljana" va "SuperChess" jamoalari 4-turga kelib ilk mag'lubiyatni qabul qilib olishdi. Bu klublar 6 ochko to'plagan holda turnir jadvalida mos ravishda 7 va 8-o'rinlarni band etgan. 

Bugun 5-turda "SuperChess" Serbiyaning "SK JAVES Modra" jamoasi bilan to'qnash keladi. "TAJFUN-ŠK Ljubljana" klubi esa CHernogoriyaning "Elektroprivreda" jamoasi bilan hisob-kitob qiladi.