Ikki shaxmatchimiz Jahon kubogining keyingi bosqichida, qolgan ikkisi bugun tay-brekda o'ynaydi

Dunyoning 206 nafar shaxmatchisi qatnashayotgan nufuzli musobaqaning 1/64 final bosqichida ikkinchi uchrashuvlar o'tkazildi. To'rt grossmeysterimizdan ikki nafari - Javohir Sindarov va Nodirbek Yakubboev ikki o'yin natijasiga ko'ra g'alaba qozonib, uchinchi bosqichga yo'l oldi. Sindarov birinchi uchrashuvda qora donalarda chernogoriyalik Nikita Petrovni mag'lubiyatga uchratgandi. Javob bahsi durang natija bilan yakunlandi. 

Nodirbek Yakubboev germaniyalik Niklas Xashimbentni taslim etdi. Ularning ilk bahsida tomonlar murosaga kelishgandi. Ikki o'yin natijasiga ko'ra 1,5:0.5 hisobida zafar quchgan Yakubboev ham keyingi bosqichga chiqdi. Qolgan ikki shaxmatchimiz - Nodirbek Abdusattorov va SHamsiddin Vohidov javob uchrashuvida ham raqiblari bilan murosaga kelishdi. Bugun ular hal qiluvchi tay-brekda o'ynashadi. 

Grossmeysterlarimizning 1/64 final bosqichidagi natijalari: 

Nodirbek Abdusattorov - Denis Maxnev (Qozog'iston) - 1:1

Javohir Sindarov - Nikita Petrov (CHernogoriya) - 1,5:0,5

Nodirbek Yakubboev - Niklas Xashimbent (Germaniya) - 1,5:0,5

SHamsiddin Vohidov - Maksim CHigaev (Ispaniya) - 1:1

Bugungi tay-brek partiyalari bizning vaqt bilan soat 14:30da boshlanadi. Javohir Sindarovning uchinchi davradagi raqibi greciyalik Nikolas Teodoru va serbiyalik Aleksandar Indjich o'rtasidagi tay-brek uchrashuvidan so'ng malum bo'ladi. Nodirbek Yakubboev uchinchi davrada vetnamlik Van Nguenga qarshi dona suradi. 

Ikkinchi bosqichda kutilmagan natijalar ham kuzatildi. Xususan, taniqli grossmeysterlardan Uesli So, Yan Nepomnyashiy, Aravindh CHitambaram, Volodar Murzin, Vasiliy Ivanchuk, David Navara, Mishra Abhimanyu ikki o'yin natijasiga mag'lub bo'lib, Jahon kubogidagi ishtirokini yakunladi.