Iroda To'laganovadan “mahorat sabog'i” FOTOGALEREYA

Xususan, mamlakatimizning taniqli tennis ustasi Urganch shahrida Sport o'yinlari va engil atletikaga ixtisoslashtirilgan BO'SM tarbiyalanuvchilari uchun “Mahorat saboqlari”(“Master klass”)ni ham o'tkazdi. 

Mashg'ulot avvalida Xorazm viloyati jismoniy tarbiya va sport boshqarmasi boshlig'i SHokir Madaminov so'zga chiqib, O'zbekiston tennis federaciyasi tomonidan uyushtirilayotgan bunday mahorat saboqlari foydadan holi bo'lmasligini, bu xorazmlik sportchilarni ulkan marralar sari etaklashini takidlab o'tdi. Buning uchun minnatdorlik bildirdi.

Mubolag'a emas, yurtimizning sevimli tennischisi ishtirokidagi “Mahorat saboqlari”   xorazmlik yoshlarga olam-olam quvonch, unutilmas daqiqalarni ulashdi, endigina tennis olamiga kirib kelayotgan o'g'il-qizlarning ham tennisga bo'lgan havas va intilishini  oshirdi. Ayniqsa, Iroda To'laganova darsning turli mashqlardan iborat interaktiv o'yinlar orqali olib borgani nafaqat yosh tennischilarda, ularning ota-onalarida ham katta taassurotlar qoldirdi. Aynan, bu holat yoshlarning tennisga oid bilim va ko'nikmalarini yanada oshirishga xizmat qildi.

Tadbirning ahamiyatli jihati yana shunda bo'ldiki, unda elimizda nom qozongan mohir tennis ustalari Farrux Do'stov va Sarvar Ikromov va boshqalar  Iroda To'laganova bilan yonma-yon turib, yoshlarga saboq berishdi. Tadbir yakunida yosh tennischilar sovg'alar taqdirlanishdi.

Qolaversa, mashg'ulotlar  xorazmlik yoshlarni  sportning ushbu turiga bo'lgan qiziqish va ishtiyoqini yanada kuchaytirdi, ezgu maqsadlar sari etakladi. Zero, taniqli tennischilar bilan bir kortda o'ynash, ulardan saboq olish yosh tennischilarga katta zavq bag'ishlagani rost.

Kezi kelganda takidlash lozimki, O'zbekiston tennis federaciyasining bosh kotibi Iroda To'laganovaning Xorazmga tashrifidan asosiy maqsad, yoshlar bilan uchrashish baraborida, viloyatda tennisning rivoji yo'lida amalga oshirilayotgan ishlar va kortlar bilan yaqindan tanishish hamda kelgusida vohada respublika va xalqaro musobaqalar o'tkazish imkoniyatlarini o'rganish ham ko'zda tutilgan. 

Ikrom XUDOYBERGANOV tayyorladi