Jahon chempionati. Afruzada ketma-ket uchinchi g'alaba, Sindorov ham yutdi

Bu galgi jahon chempionati 8, 10 hamda 12 yoshli shaxmatchilar o'rtasida tashkil etilyapti.

Dunyoning 100ga yaqin mamlakatidan istedodli shaxmatchilar ishtirok etayotgan musobaqada hamyurtlarimiz – aka-uka jahon chempionlari Islombek va Javohir Sindarov, Osiyo chempioni Humoyun Bekmurodov, qizlardan Maftuna Bobomurodova, Yuliya Xegay va Afruza Hamdamovalar yurtimiz sharafini himoya qilishyapti.

Sakkiz yoshlilar o'rtasidagi musobaqada imkoniyatini sinab ko'rayotgan Humoyun Bekmurodov 3-turda qora donalarda ozarboyjonlik Hoji-Ali Gafarovga qarshi baxs olib bordi va durangga erishdi.

O'n yoshli shaxmatchilar bahsida birinchi raqam ostida tasniflangan Islombek Sindorov qora donalarda o'ynashiga qaramay, chexiyalik Stepan Xrbekni mag'lub etdi.

O'n ikki yoshli shaxmatchilar musobaqasida ikkinchi tartib raqamli ishtirokchi bo'lgan Javohir Sindorov esa 3-turda hindistonlik Moxan Kushagra bilan murosaga keldi.

Qizlarimizdan Afruza Hamdamova barchani hayratlantirishda davom etyapti. Afruza ketma-ket uchinchi g'alabasini qo'lga kiritdi. U reytingda o'zidan yuqorida turgan ruminiyalik Aleksandra Mariyani taslim etdi.

Yuliya Xegay mo'g'ulistonlik Erdene Bat Gandi bilan durangga erishdi. Maftuna Bobomurodova esa polshalik Magdalena Pashikaga yutqazib qo'ydi.