Jahon chempionatida qatnashayotgan yagona ayol shaxmatchimiz hozircha 11-o'rinda!

Ayollar o'rtasidagi dunyo birinchiligida yagona vakilamiz Afruza Hamdamova (2188) yurtimiz sharafini himoya qilmoqda. Yoshlar o'rtasida ikki karra jahon chempioni bo'lgan Afruza 4 imkoniyatdan 3 ochko jamg'arib, qo'shimcha ko'rsatkichlarga ko'ra 11-o'rinni egallab turibdi. Ettinchi pog'onadagi ikki karra jahon chempioni Valentina Gunina (FIDE, 2388) hisobida ham 3 ochko bor. 

Hamdamova 1-turda qora donalarda harakat qilganiga qaramay, hindistonlik grossmeystr Rameshbabu Vayshali bilan durang o'ynadi. Ikkinchi turda reytingda o'zidan ancha yuqorida borayotgan Lela Javaxishvili (Gruziya, 2321)ni taslim etdi. Uchinchi turda qora donalarda o'ynab, Miaoyi Lu (Xitoy, 2317)dan ustun keldi. To'rtinchi turda uch karra jahon chempioni Anna Muzichuk (Ukraina, 2408) bilan murosaga keldi. 

Turnir jadvalida 4 imkoniyatdan 4 ochko jamg'argan mezbonlar vakilasi Alise Li (AQSH, 2415) yakka peshqadam bo'lib turibdi. Xitoyliklar Venjun Ju (2536) va Jong Yi Tan (2502), hindistonlik Harika Dronovalli (2416), gruziyalik Nino Batsiashvili (2333) hamda ozarbayjonlik Gunay Mammadzada (2319) hisobida 3,5 tadan ochko bor. 

AQSH sharafini himoya qilayotgan Gulruhbegim Tohirjonova 4 imkoniyatdan 2,5 ochko jamg'arib, qo'shimcha ko'rsatkichlarga ko'ra 33-pog'onadan joy olgan. U 2 g'alaba, 1 durang va 1 mag'lubiyat qayd etgan. 

Beshinchi turda Afruza Hamdamova qora donalarda o'zi singari 3 ochkoga ega bo'lib turgan ruminiyalik Irina Bulmaga (2378) bilan hisob-kitob qiladi. Gulruhbegim Tohirjonova esa oq donalarda ukrainalik grossmeyster Mariya Muzichuk (2422)ga qarshi bahs olib boradi.