Jahon chempionatining ikkinchi kunidan keyin Nodirbek va Javohir Top-10`talikda, peshqadam bilan farq 0,5 ochko!

Dunyo birinchiligining ikkinchi kuni rapid bo'yicha 4 ta tur partiyalari o'ynaldi. Jahonning ko'zga ko'ringan shaxmatchilari qatori O'zbekiston terma jamoasining etakchi grossmeysterlari ham sovrinli o'rinlar uchun bahs olib borishyapti. Blic va rapid bo'yicha amaldagi jahon chempioni Magnus Karlsen 8-turdan keyin musobaqani tark etdi. U nafaqat rapid, balki blic bahslarida ham qatnashmaydi. Jahon chempionati bu yog'iga Magnussiz davom etadi. Norvegiyalik shaxmat yulduzi 8 imkoniyatdan 5 ochko jamg'arib, qo'shimcha ko'rsatkichlarga ko'ra 68-o'rinni egallagan. 

Hamyurtlarimiz orasidan Nodirbek Abdusattorov (2740) va Javohir Sindarov (2655) eng yaxshi ko'rsatkichga ega bo'lib turibdi. Jahon chempionatida 9-raqam ostida tasniflangan Nodirbek ikki kunlik bahslarda 6 g'alaba, 1 durang va 2 mag'lubiyat qayd etdi. U 3-turda qora donalarda amerikalik Aleksandr Lenderman (2621)ga imkoniyatni boy bergandi. Bugun tunda Daniel Narodickiy (AQSH, 2638) ham Nodirbekni mag'lub eta oldi. Abdusattorov 6-turda Raunak Sadhvani (Hindiston, 2591), 8-turda esa Alan Pichot (Ispaniya)ni mag'lubiyatga uchratdi. 9-turda qora donalarda Aleksandr Grishuk (FIDE, 2675) bilan murosaga keldi.  

SHu tariqa, Nodirbek Abdusattorov 9 imkoniyatdan 6,5 ochko jamg'arib, qo'shimcha ko'rsatkichlarga ko'ra 7-o'ringa ko'tarilib oldi. Birinchi kungi bahslardan so'ng u 9-pog'onani egallab turgandi. Beshinchi o'rindagi amerikalik Samuel Sevianda ham 6,5 ochko bor. 

Yana bir grossmeysterimiz Javohir Sindarov ham 9 imkoniyatdan 6,5 ochko to'pladi. U qo'shimcha ko'rsatkichlarga ko'ra 4 g'alaba va 5 durang bilan 14-pog'onadan 9-o'ringa ko'tarilib oldi. Javohir 9 ta turda hali yutqazmadi va bu zo'r natija! Sindarov amerikalik nomdor shaxmatchilar Hikaru Nakamura (AQSH, 2755), Lener Dominges (AQSH, 2699) va Daniel Narodickiy (AQSH, 2638) bilan durang o'ynadi. Turkiyalik Isik Kanni esa taslim etdi. 

Qolgan shaxmatchilarimizning ishtirokiga to'xtaladigan bo'lsak, Jahongir Vohidov ikkinchi kungi uchrashuvlarni yaxshi o'tkazdi. U 4 imkoniyatdan 3 ochko jamg'arib, 5,5 ochko bilan qo'shimcha ko'rsatkichlarga ko'ra 79-pog'onadan 37-o'ringa ko'tarilib oldi. SHamsiddin Vohidov 4 ochko bilan aksincha, 70-o'rindan 120-pog'onaga tushib ketdi. Muhiddin Madaminov esa 4 ochko bilan 125-pog'onada bormoqda. 

Beshinchi turdan so'ng to'rt nafar ishtirokchi - Volodar Murzin (FIDE, 2588), Yan-Krishtof Duda (Polsha, 2740), Arjun Ergaisi (Hindiston, 2694) va Aleksandr Grishuk (FIDE, 2675) 7 ochkodan to'plab, qo'shhokimlik qilishyapti. O'n nafar shaxmatchi 6,5 ochkodan jamg'argan. Ular orasida Nodirbek Abdusattorov va Javohir Sindarov ham bor.