Jahon kubogi. Bugun 1/4 final boshlanadi. Sindarov Abdusattorov uchun "o'ch" olishga urinib ko'radi

Dunyoning 206 nafar shaxmatchisi ishtirokida boshlangan nufuzli musobaqada bugun 1/4 final bosqichi start oladi. Kecha nimchorak finalning tay-brek bahslari o'tkazilib, grossmeysterlarimizning 1/4 finaldagi raqiblari malum bo'ldi. 19 yoshli Javohir Sindarov Xose Martines Alkantara qarshi bahs olib boradi. Meksikalik bu shaxmatchi turnir kashfiyotiga aylanib ulgurdi. U uchinchi bosqichda Nodirbek Abdusattorovni mag'lubiyatga uchratgan edi. Sindarov Nodirbekning mag'lubiyati uchun revansh olishga urinib ko'radi. 

Malumot uchun, Javohir dramatik kechgan 1/8 final bosqichida germaniyalik grossmeyster Frederik Svenni mag'lubiyatga uchratgandi. Sven uchinchi bosqichda amaldagi jahon chempioni hindistonlik Gukesh Dommaradjuni musobaqadan chiqarib yuborgani etiborga molik holat. 

Oltinchi davraga etib kelgan ikkinchi grossmeysterimiz Nodirbek Yakubboev nimchorak finalda armanistonlik Gabriel Sargissyanni 1,5:0,5 hisobida taslim etgandi. Uning 1/4 finaldagi raqibi yana bir nemis shaxmatchisi Aleksandr Donchenkoga qarshi dona suradi. Donchenko chorak finalga qadar Anish Giri, Mattias Blubaum, Liem Le singari taniqli grossmeysterlarni musobaqadan chiqarib yuborgan.