Jahon kubogi. Final chiptasi uchun kechayotgan o'zbek derbisining ilk partiyasi yakunlandi

Xabaringiz bor, ushbu bosqichga ikki grossmeysterimiz Nodirbek Yakubboev va Javohir Sindarov etib kelgandi. Ular 1/2 finalda bir-birlariga qarshi tushib qolishgan edi. Biroz avval yarim finalning ilk partiyasi yakunlandi. Har ikki shaxmatchimiz ham bexato o'ynagan uchrashuvda durang natija qayd etildi. Bugun Yakubboev oq donalarda harakat qildi. Ertaga yarim finalning ikkinchi partiyasi o'tkaziladi va endi Sindarov oq donalarda o'ynaydi. Durang bo'lib qolgan taqdirda ertadan keyin hal qiluvchi tay-brek partiyalariga murojaat qilinadi.  

Eslatib o'tamiz, 1/2 finalda g'alaba qozongan shaxmatchilar Jahon toji uchun kechadigan Davogarlar turniri chiptasini qo'lga kiritadi. Yarim finalda yutqazganlar esa o'zaro 3-o'rin uchun bahsda so'nggi yo'llanma taqdirini hal qiladilar. Har qanday holatda ham Davogarlar turniriga aniq bir shaxmatchimiz yo'llanmani qo'lga kiritadi. Ikkinchisida ham oxirigacha imkoniyat saqlanib qoladi. 

Ayni daqiqalarda ikkinchi 1/2 final juftligida rossiyalik Andrey Esipenko xitoylik Vey Yiga qarshi dona suryapti. Hozircha doskada tenglik holati bo'lib turibdi.