Jamoa egizak sportchilarning mahorati evaziga kubok sohibi bo'ldi FOTOGALEREYA

O'zbekiston mudofaasiga ko'maklashuvchi “Vatanparvar” tashkiloti Xorazm viloyati kengashi tasarrufidagi viloyat texnik va amaliy sport turlari markazining joriy yilgi taqvim rejasiga asosan o'tkazilgan musobaqada 16 ta jamoaning 33 nafar yozgi biatlon ustasi belgilangan masofaga yugurish hamda pnevmatik miltiqdan tik turgan va yotgan holda o'q otish mashqini bajarish borasida o'z mahoratini sinovdan o'tkazdi.

Bellashuvlarda Qo'shko'pir tumani o'quv sport texnika klubi jamoasi sportchilari yuqori natijaga erishishdi. Binobarin, jamoaning egizak sportchilari - Odamboy Rahimov o'g'il bolalar o'rtasida, Havojon Rahimova esa qizlar orasida shohsupaning eng yuqori pog'onasiga ko'tarildi.

SHuningdek, qizlar birinchiligida SHovot tumani o'quv sport texnika klubi azolari Mashhura Ernafasova ikkinchi, Zuhra Ro'zimova uchinchi o'rin sohibasiga aylanishdi. O'g'il bolalar musobaqasida Qo'shko'pir tumanining “O'rtayop” O'STK jamoasidan Diyorbek Rajabov, SHovot tumanidan Foziljon Ismoilovlar sovrinli o'rinlarni egallashdi.

Umumjamoa hisobida egizak sportchilar ko'rsatgan natijalar evaziga Qo'shko'pir tumani O'STK jamoasi yozgi biatlon bo'yicha 2019 yilgi Xorazm viloyati kubogini qo'lga kiritdi. “O'rtayop” O'STK hamda SHovot tumani O'STK jamoalari mos ravishda ikkinchi va uchinchi o'rindan joy oldi.

Musobaqaning yopilish marosimida qatnashgan viloyat texnik va amaliy sport turlari markazi direktori A.Ibragimov g'olib va sovrindor sportchilarni qutlab, kelgusi musobaqalarda ham omad tiladi. 

Endilikda, xorazmlik eng mohir yosh yozgi biatlonchilar joriy yilning 18-21 sentyabr  kunlari Toshkent viloyatining CHirchiq shahrida o'tkaziladigan respublika musobaqasida g'oliblik uchun bahs yuritishadi.

Ikrom Xudoyberganov tayyorladi /Urganch/