Javohir Sindarov ham Jahon kubogi 1/2 finalida! Final chiptasi uchun o'zbek derbisiga guvoh bo'lamiz!

Hindistonning Goa shahrida davom etayotgan shaxmat bo'yicha umumiy mukofot jamg'armasi 2 million AQSH dollarini tashkil qiluvchi Jahon kubogida 1/2 finalchilar aniqlandi. Dunyoning 206 nafar shaxmatchisi ishtirokida boshlangan nufuzli musobaqada bugun 1/4 finalning hal qiluvchi tay-brek o'yinlari o'tkazildi. 

Grossmeysterimiz Nodirbek Yakubboev 1/4 finalning asosiy partiyalarining o'zida germaniyalik Aleksandr Donchenkoni 1,5:0,5 hisobida mag'lubiyatga uchratib, Jahon kubogining 1/2 finaliga yo'l olgandi.  

Bugun bu vazifani 19 yoshli Javohir Sindarov ham uddaladi. Meskikalik Xose Martines Alkantaraga qarshi kechgan asosiy partiyalarda durang natija qayd etilgandi. Bugungi tay-brekning dastlabki ikki partiyasida ham tomonlar 1 tadan g'alabaga erishishdi. Navbat 10+10 formatdagi tay-brekka etdi. Uning birinchi partiyasida kuchlir teng keldi. Ikkinchi partiyada oq donalarda o'ynagan Sindarov Martinesni mag'lubiyatga uchratdi. 

Umumiy hisob 3,5:2,5 ga etdi, Javohir 1/2 finalda! Sindarov bu g'alabasi evaziga yarim finalga chiqish barobarida Nodirbek Abdusattorov uchun ham "o'ch" oldi. Turnir kashfiyotiga aylangan meksikalik shaxmatchi uchinchi bosqichda Nodirbek Abdusattorovni mag'lubiyatga uchratgandi. 

Etiborlisi, endi 1/2 finalda o'ziga xos o'zbek derbisiga guvoh bo'lamiz. Javohir Sindarov Nodirbek Yakubboevga qarshi ham final, ham Jahon toji uchun Davogarlar turniri chiptasi uchun dona suradi. G'olib shaxmatchi yo'llanmaga ega bo'ladi. Mag'lub grossmeyster esa 3-o'rin uchun bahsda bu imkoniyatdan yana foydalanib ko'radi. Yani, Davogarlar turniriga aniq bir shaxmatchimiz yo'llanmani qo'lga kiritadi. Ikkinchisida ham oxirigacha imkoniyat saqlanib qoladi. 

Yana bir qiziq tomoni shundaki, Hindistonda o'tkazilayotgan ushbu nufuzli turnirning 1/2 finaliga kelib, bironta ham hind shaxmatchisi qolmadi. Mezbonlarning so'nggi vakili Arjun Erigaisi 1/4 finalda xitoylik Vey I tomonidan mag'lub etildi.     

Jahon Kubogi. 1/4 final natijalari

Nodirbek Yakubboev — Aleksandr Donchenko - 1,5:0,5

Andrey Esipenko — Sem SHanklend - 4:2

Vey I — Arjun Erigaysi - 2,5:1,5

Javohir Sindarov — Xose Martines - 3,5:2,5