Javohir va Gukesh ishtirokidagi turnir boshlandi. Birinchi kundan so'ng Sindarov toj sohibidan yuqorida!

Ananaviy tarzda rapid va blic yo'nalishlari bo'yicha o'tkazib kelinayotgan ushbu nufuzli musobaqada amaldagi Jahon toji sohibi hindistonlik Gukesh Dommaradju hamda chempionlik uchun rasmiy davogar, "Nomzodlar turniri" g'olibi Javohir Sindarov ham bosh sovrin uchun o'ynayapti.

Musobaqaning ilk kuni shaxmatchilar rapid yo'nalishida uchta turda o'zaro hisob-kitob qilishdi. Javohir Sindarov 1-turda qora donalarda amerikalik Hans Mok Niemann, 2-turda oq donalarda polshalik Yan-Krishtoff Duda bilan durang o'ynadi. Uchinchi turda esa qora donalarda o'ynaganiga qaramay, yana bir mezbon shaxmatchi Radoslav Voytashekni mag'lubiyatga uchratdi. 

Turnir reglamentiga ko'ra, har bir g'alabaga 2, durangga 1 ochko beriladi. Bugun ikkinchi tur doirasida rapid yo'nalishida yana 3 ta tur uchrashuvlari o'tkaziladi. Bizning vaqt bilan soat 17:00da boshlanadigan 4-turda Sindarov qora donalarda amerikalik Uesli Soga qarshi bahs olib boradi. 

Uchinchi turdan so'ng musobaqaning amaldagi chempioni sloveniyalik Vladimir Fedoseev 4 ochko bilan qo'shimcha ko'rsatkichlarga ko'ra peshqadamlik qilmoqda. Hans Mok Niemann, Fabiano Karauna, Uesli So va Javohir Sindarov hisobida ham 4 ochkodan bor. Gukesh Dommaradju 3 ochko bilan 6-pog'onadan joy olgan. Radoslav Voytashek 3 ta turda ham mag'lubiyat alamini totib ko'rdi. 

Bugun 5-turda Javohir Sindarov va Gukesh Dommaradju o'zaro to'qnash keladi. Hamyurtimiz oq donalarda o'ynaydi. Bugunga belgilangan so'nggi 6-turda Javohir qora donalarda franciyalik Maksim Vashe-Lagrav bilan hisob-kitob qiladi.