Jismoniy tarbiya va sport vazirligi ishchi guruhi Andijon viloyatida sportni yanada rivojlantirish borasida ko'maklashmoqda

Bunda Andijon viloyati tuman va shaharlarini to'rt hududga bo'lgan holda ishchi guruhning vazifalari belgilab olindi hamda shunga ko'ra yo'l xaritasi ishlab chiqildi.

Bugun tongdan ish faoliyatiga kirishgan ishchi guruhning bir guruh vakillari Andijon viloyatining chekka hududi hisoblangan Xonabod tumanidagi Bolalar-o'smirlar sport maktabi va unga qarashli sport inshootlarining bugungi holatini o'rganishdan boshlagan bo'lsa, ikkinchi guruh vakillari viloyatning Qo'rg'ontepa, Buloqboshi tumanlarida bo'ldi.

Bu hududlarda sport maktablari va sport talim muassasalarining kadrlari salohiyati va trenerlarga bo'lgan ehtiyoji hamda uni bartaraf etish bo'yicha maqsadli qabul bo'yicha takliflari o'rganib chiqilmoqda. SHuningdek, hududlarning sport turlariga ixtisoslashuvi, moddiy texnik bazasining holatini yanada rivojlantirish, sport inventarlari soni va bugungi holati, terma jamoa azolarini shakllantirish masalalari bo'yicha ishchi guruh tuman masullariga yaqindan ko'maklashmoqda.

Bundan tashqari, hududlardagi sport maktablari va sport talim muassasalarining bo'sh er maydonlari va ulardan maqsadli foydalanish rejasi bo'yicha tadbirkorlar tomonidan kiritilayotgan takliflar ham ko'rib chiqilib, ikki tomonlama manfaatli hamkorlikni yo'lga qo'yish bo'yicha tadbirkorlar bilan yuzma-yuz ochiq suhbatlar o'tkazilmoqda.

SHuningdek, Andijon viloyati bo'ylab tashkil etilayotgan jismoniy tarbiya va sport tadbirlarini respublika bo'ylab ommaviy axborot vositalarida keng yoritib borish jarayonlari o'rganilib, bu bo'yicha amaliy ko'mak berish masalasi tegishlicha hal etilmoqda.

Ertaga ishchi guruh o'z faoliyatini davom ettirib, Jalaquduq, Asaka, Marhamat va Andijon tumanlaridagi holatlarni o'rganib chiqadi.

Yakunda viloyat sportining bugungi holatini o'rgangan holda, hududlardagi taklif va ehtiyojlardan kelib chiqib, ishchi guruh tomonidan Andijon viloyatida sportni yanada ommalashtirish va rivojlantirish bo'yicha maxsus dastur ishlab chiqiladi.

Jismoniy tarbiya va sport vazirligi Matbuot xizmati