Jismoniy tarbiya va sport vazirligi tomonidan qariyb 600 million so'mlik sahovat ko'rsatildi

Bugungi sinovli kunlarda yurtdoshlarimiz koronavirus pandemiyasidan jabr chekkan aholini har tomonlama qo'llab-quvvatlash maqsadida sahovat ko'rsatishmoqda.

Xayrli ishdan O'zbekiston Respublikasi Jismoniy tarbiya va sport vazirligi hamda uning tizimidagi tashkilotlar ham chetda qolayotgani yo'q. Mamlakatimiz sport jamoatchiligi ham xalqimiz boshiga musibat tushgan shu kunlarda ular bilan bir tanu bir jon ekanligini namoyish etishmoqda.

Jismoniy tarbiya va sport vazirligi hamda uning tizim tashkilotlari tomonidan “O'zbekiston Mehr-shafqat va salomatlik” jamoat fondiga jami 599 120 115 (besh yuz to'qson to'qqiz million bir yuz yigirma ming bir yuz o'n besh) so'm miqdoridagi mablag' xayriya tarzida o'tkazib berildi.

Sahovatli sportchi va trenerlarimiz ham mazkur akciyada faol ishtirok etishmoqda. Bunga Mirjalol Qosimov, Odil Ahmedov, Otabek SHukurov va boshqa ko'plab sport sohasi vakillarining koronavirus pandemiyasidan aziyat chekayotgan aholini qo'llab-quvvatlash yo'lida ko'rsatayotgan beg'araz yordamlarini misol keltirish mumkin.

Albatta, davlatimiz g'amxo'rligi natijasida hech kim hech narsaga muhtojlik sezgani yo'q, bunday bo'lmaydi ham. Zero, bag'rikeng xalqimiz sinovli kunlarda hech qachon bir-birini yolg'izlatib qo'ymaydi. Bu kabi akciyalar sinovli damlarda xalqimizni yanada jipslashtirib, ular o'rtasida hamjihatlikni kuchaytiradi, har qanday vaziyatda ham har bir inson davlat va jamiyat etiboridan chetda qolmasligini amalda isbotlaydi.