Jumaev Nyu-Delidagi turnirda kuchli uchlikka kirib oldi

15th Delhi International Open Grandmasters shess tournament musobaqasida uch nafar grossmeysterimiz – Marat Jumaev, Gulruhbegim Tohirjonova va Sarvinoz Qurbonboevalar ham o'z imkoniyatlarini sinovdan o'tkazishyapti. 

Kecha o'tkazilgan 9-tur uchrashuvlaridan so'ng Marat Jumaev 9 imkoniyatdan 7,5 ochko jamg'arib, 3-o'ringa ko'tarilib oldi. Ikkinchi o'rindagi shaxmatchi hisobida ham 7,5 ochko bor. 

Jumaev 9-partiyada qora donalarda o'ynashiga qaramay, o'zi singari 6,5 ochko jamg'arib turgan hindistonlik Niranjan Navalgundni mag'lubiyatga uchratdi.

Bugun hamyurtimiz 10-tur uchrashuvida musobaqaning beshinchi tartib raqamli ishtirokchisi hindistonlik Murali Martikeyanga qarshi qora donalarda harakat qiladi. Jumaev turnirda 20-raqam ostida tasniflangan.

Sarvinoz Qurbonboeva bu safar qora donalarda o'ynab, mezbon shaxmatchi Vikramjit Sinxga yutqazib qo'ydi. U kechagi mag'lubiyatdan so'ng 44-o'rindan 73-pog'onaga tushib ketdi.

Gulruhbegim Tohirjonova esa qora donalarda harakat qilib, mezbon shaxmatchi Gosh Aronyak bilan murosaga keldi. Gulruhbegim 5,5 ochko bilan 52-pog'onani band etgan.