Kamondan otish bo'yicha Olimpiada yo'llanmasini qo'lga kiritgan ilk o'zbekistonlik: "Jamoaviy yo'nalishda ham licenziya qo'lga kiritmoqchimiz"

Bu natija bilan Olimpiya o'yinlarida O'zbekiston delegaciyasi qatnashadigan sport turlarining geografiyasi yana bittaga ko'payadigan bo'ldi. MOQ matbuot xizmati Tailanddan tarixiy natija bilan qaytgan sportchimiz bilan qisqa suhbat uyushtirdi.

– Olimpiya o'yinlarida ishtirok etadigan o'zbekistonlik birinchi kamonchi bo'lish taassurotlari qanday ekan?

– Olimpiadalarda kamondan otish sportida yurtimiz sharafini birinchi bo'lib himoya qilish men uchun katta baxt. Buning hissiyotlarini so'z bilan tariflab bera olmayapman. Bu sportimiz, qolaversa, O'zbekiston kamondan otish federaciyasi uchun juda muhim va quvonchli voqelik bo'ldi. Ishonamanki, bunday yirik natijalar mamlakatimizda kamondan otish sporti yanada rivojlanishiga oz bo'lsa ham hissa qo'shadi.

– Faoliyatingizdagi eng muhim o'q uzish oldidan xayolingizdan nimalar o'tdi?

– Men uchun barcha uzilgan o'qlar juda muhim. Tailandda hal qiluvchi palladagi o'q ulardan biri. O'q uzishdan oldin xayolim faqat qoq markazni nishonlash va qanday bo'lmasin, 10 ochkolik aylanani poylash edi. Buni uddalay olganimdan xursandman.

– Minimum vazifa bajarildi. Endi oldinga qo'yilgan vazifa qanday?

– Oldimizda hali katta maqsadlar bor. Biz uchun licenzion davr yakunlangani yo'q. Kelasi yil jamoaviy yo'nalishda ham Olimpiada yo'llanmasini qo'lga kiritish va Parijdan medal bilan qaytish uchun bor kuchimizni ishga solamiz.

– Olimpiadani qanday tasavvur qilyapsiz?

– Parij-2024 Olimpiadasini ko'tarinki ruhda o'tadigan, yorqin xotiralarga to'la, o'z sportida dunyoning eng zo'rlari bellashadigan, asosiysi, O'zbekiston delegaciyasi uchun chiroyli g'alabalarga boy musobaqa bo'ladi, deya tasavvur qilyapman.