Karate. O'zbekiston milliy terma jamoasi azosi Sevinch Raximova bilan intervyu

- Karatedagi faoliyatingizni qachon boshlagansiz va birinchi murabbiyingiz kim bo'lgan?

- Maktab paytlarimdan yani 2013-yildan boshlab karate bilan muntazam shug'ullanib kelaman. 

Birinchi murabbiyim Sulaymon Yusupov. U kishidan juda minnatdorman, ularning o'rgatganlari tufayli mana shu darajagacha etib keldim. 

- Qiziq,  nima uchun badiiy gimnastika emas, umuman, nega aynan karate?

- Menga yakkakurash sport turlari juda yoqadi. O'zi birinchi qatnashgan sport turim aynan sport gimnastikasi bo'lgan. Keyin murabbiyim xorijga ketib qolgandi. Biroz vaqt o'tgach, karatega o'tib ketishga to'g'ri kelgan. 

- O'zbekiston terma jamoasi safiga qo'shilish qiyin kechmadimi? 

- Bu yo'lda ko'p mehnat qildim deya olaman. Yurtimizdagi turnirlar va xalqaro musobaqalarda sovrinli o'rinlarni qo'lga kiritib kelmoqdaman.  SHu yutuqlar orqali murabbiylar etiboriga tushdim va termaga jalb qilindim. 

- 2019 yil Toshkentda o'tkazilgan Osiyo chempionatida 2-o'rinni qo'lga kiritgansiz. CHempion bo'la olmaganingizga nima sabab bo'ldi deb o'ylaysiz?

- Osiy chempionati shu paytgacha men qatnashgan eng yirik musobaqa sanaladi. Bundan tashqari, raqibim ham kuchli edi. SHu faktorlar asosiy sabablar bo'lsa kerak. Lekin, Osiyo chempionati orqali Olimpiada reyting ballariga ega bo'ldim. SHu tufayli Premer-liga bahslarida ishtirok etishga muyassar bo'lmoqdaman. 

- Yurtimizda aksariyat ota-onalar o'z qizlarini yakkakurash sport turlariga berishni istashmaydi...

- Yo'q, qarshilik qilishmagan. Otamning o'zlari sobiq boks murabbiyi. Sport gimnastikasidan tashqari, aynan boks bilan ham shug'ullanganman, lekin baribir karatega qiziqish kuchlilik qilgani bois aynan shu sportga kirib keldim.  

- Qiynalgan paytlaringizda karateni tashlab ketish niyati xayolga kelmaganmi?

- Musobaqalarda oxirida mag'lub bo'lish menga yoqmasdi. O'zbekiston chempionati finallarida ko'p yutqazib qo'yganman. Siz aytgan holatlar sodir bo'lgan, albatta. Ammo, sportda hech qachon taslim bo'lmaslik lozim. Agar Osiyo chempionati saralashida finalda engilsam, ketaman deb xayol qilganman, ammo shukrki, Osiyo chempionati saralashida 1-o'rinni oldim. Endilikda oldimda turgan maqsad Tokio Olimpiadasi yo'llanmasini qo'lga kiritishdir.  

SHerzod Nurmatov tayyorladi