Karlos Alkaraz Mayami "Masters" turniri yarim finalida!

Jahonning 16-raketkasi ispaniyalik Karlos Alkaraz turnirning chorak finalida ATR reytingida 48-o'rinni egallab turgan serbiyalik Miomir Kechmanovichni 6/7, 6/3, 7/6 hisobida mag'lub etdi va "Masters"ning yarim finaliga chiqdi.

Uchrashuv 2 soatu 26 daqiqa davom etdi. Ushbu vaqt davomida 18 yoshli Alkaraz beshta eys zarbaini amalga oshirib, uch bor qo'shxatoga yo'l qo'ydi va ikkita breyk-poyntdan unumli foydalandi. 22 yoshli Kechmanovich esa ikkita eys qayd etib, to'pni o'yinga kiritishda ikki marta xato qildi va bitta breyk qayd etdi. Bu sportchilarning o'zaro birinchi rasmiy uchrashuvi edi.

Miami Open turnirining yarim finalida Alkaraz polshalik Xubert Xurkachga qarshi bahs olib boradi.

Eslatib o'tamiz, Mayami turnirining umumiy sovrin jamg'armasi 8 million 584 ming 55 dollarni tashkil etadi. Musobaqaning amaldagi g'olibi aynan Xubert Xurkach hisoblanadi.