Kasbidagi sport maktabida kutubxona ish boshladi

Boisi, Kasbi tuman bolalar-o'smirlar sport maktabi jaoasi Qashqadaryo viloyatidagi BO'SMlar orasida birinchilardan bo'lib o'z hududida kutubxona tashkil etdi. Qashqadaryo viloyat Turizm va sport boshqarmasi tasarrufidagi mazkur bolalar-o'smirlar sport maktabi direktori Faxriddin Yahyoev tashabbusi va say-harakatlari natijasida ushbu mo'jazgina kutubxona faoliyati yo'lga qo'yildi. 

BO'SM direktorining bolaligidan kitobga oshno bo'lib, shaxsiy kutubxonasida ko'plab badiiy adabiyotlar jamlangan edi. F. Yahyoev dastlab, ushbu kitob jamlanmalarini BO'SMdagi mavjud bo'sh xonalardan biriga joylashtirib, kutubxona shakliga keltiradi. Keyinchalik bu tashabbusni qo'llab-quvvatlovchilar ham ko'payib, ko'pchilik BO'SMga badiiy kitoblar sovg'a qilishadi.

- Kitob mutolaasiga va ularni to'plashga juda qiziqaman, - deydi Kasbi tuman BO'SM direktori F.Yahyoev. - SHu bois qaysi kitob do'konida qiziqarli kitoblar ko'rsam xarid qilib, o'qib chiqaman. SHu qiziqishlarim natijasida uyda anchagina kitoblar to'planib qolgan ekan. Kitobning eng yomoni o'qilmagani, deganlaridek qolganlar ham o'qib, manaviy ozuqa olsin degan umidda mana shu kutubxonani tashkil etdik. Rosti, hozir ko'pchilik telefon, internetga qiziqib ketgan, kitobga qiziqish kam bo'lsa kerak degandim. Yo'q, adashgan ekanman. Hozir kitob o'qish istagidagi yoshlarni, ayniqsa, mashg'ulotlardan bo'shagan o'g'il-qizlarimizning ushbu kutubxonaga kirib, kitob o'qiyotganini ko'rib, hayratda qoldim va boshlagan ishimiz besamar ketamaganligidan mamnun bo'ldik. Hatto, yaqin atrofdagi mahalla odamlari ham kitob o'qish uchun kelishayotgani yanayam quvonarli.

Hozirda ikki mingdan ortiq milliy o'zbek adabiyoti hamda jahon adabiyotiga, qolaversa, bolalar adabiyoti mansub badiiy kitoblar bilan boyitilgan kutubxonani BO'SM mamuriyati tez orada yanada kengaytirish harakatida ekan. 

Ha, yaxshi kitob insonda Vatanga muhabbat, milliy va umuminsoniy qadriyatlarga hurmat tuyg'ularini yuksaltirib, yaxshilik va ezgulik sari etaklaydi. Demak, Kasbidagi ushbu bolalar-o'smirlar sport maktabida mashg'ulotlarga zo'r berayotgan o'g'il-qizlar ham o'zlari uchun yaratilgan kutubxonada kitob mutolaa qilgan sari manaviyati yuksalib, tug'ilgan manzil-makoniga, Yurtiga mehr-muhabbatli, oriyati baland, g'ururi osmon kabi komil inson bo'lib voyaga etishiga shubha yo'q!    

Ilhom RAHMONOV tayyorladi