Kasper Ruud US Open turniridagi ishtirokini yakunladi

Norvegiyalik tennischi 1/8 finalda dunyoning 12-raketkasi, amerikalik Teylor Fritcga 6/3, 4/6, 3/6, 2/6 hisobida imkoniyatni boy berib qo'ydi. Teylor tennischilarning o'zaro uchrashuvlarida ilk bor g'alaba qozondi. Bundan avvalgi ikki bahsda Ruudning qo'li baland kelgan edi.

Ikki soatu 45 daqiqa davom etgan bahsda Ruud 4, Fritc esa oz emas, ko'p emas, 23 ta eys zarbasini amalga oshirgan. Qo'shxatolar Kasperda ko'proq bo'ldi - 8 ga 7. Breyklar bo'yicha ustunlik esa g'olib tennischi tomonida bo'ldi - 4 ga 1! Endi Fritc yarim final chiptasi uchun germaniyalik Aleksandr Zverevga qarshi kortga chiqadi.