London-2017 Para-atletika JCHda O'zbekiston delegaciyasining muvaffaqiyatli ishtiroki davom etmoqda

Londonda bo'lib o'tayotgan jahon chempionatida hamyurtlarimiz yana 2ta medalni qo'lga kiritdilar. Ulardan erkaklar o'rtasida engil atletikaning nayza otish turi bo'yicha ishtirok etgan xamyurtimiz Aleksandr Svechnikov 71.01m natijasi bilan navbatdagi oltin medalni qo'lga kiritdi va jahon rekordini yangiladi. 2-o'rinni eronlik sportchi Nikarast Najat 61.88m natija bilan egallagan bo'lsa, 3-o'rin 61.53m natija bilan ispaniyalik Kabrera Leserga nasib etdi.

Ayollar o'rtasida kechgan bahsda esa hamyurtimiz Nozima Qayumova 41.25m. natijasi bilan xitoylik raqibi Zao Yupingga (42.72m.) boy berdi. Yakunda u ikkinchi o'rinni egallab, kumush medali sohibasiga aylandi. 3-o'rin esa avstriyalik sportchi Eder Nataliyaga (38.37m.) nasib etdi.

Eslatib o'tamiz, mazkur chempionat 10 kun davom etadi va 1050ta sportchilar 213ta medalli o'rinlar uchun kuch sinashadilar. SHular orasida paralimpiya sportchimiz Xusnuddin Norbekov 15 iyul kuni 54.73 natija bilan birinchi o'rinni egallab, ikkinchi marotaba Jaxon chempioni unvonini qo'lga kiritgan edi. Ikkinchi oltin medalni esa Doniyor Saliev uzunlikka sakrash bo'yicha 7.18m. natijasi bilan qo'lga kiritgan edi.