Mag'lubiyatsiz Sindarov Saint Louis Rapid & Blitz 2026 rapid bahslarini nechanchi o'rinda yakunladi?

Ushbu nufuzli turnirda hamyurtimiz Javohir Sindarov ham muvaffaqiyatli dona surmoqda. Musobaqaning uchinchi kuni rapid bo'yicha so'nggi uchta tur uchrashuvlari o'tkazildi. Bu safar ham Javohir mag'lubiyatga uchramadi. U o'tkazilgan uchta partiyada bir g'alaba va ikki durang qayd etdi. Ettinchi turda mezbonlar vakili Lener Dominges, 9-turda asosiy taqibchisi Uesli So (AQSH) bilan durang o'ynagan Sindarov 8-turda amerikalik Evonder Liangni mag'lubiyatga uchratdi. 

SHu tariqa, Javohir Sindarov rapid bahslari 11 ochko bilan ikkinchi o'rinda yakunladi. Hindistonlik Rameshbabu Praggnanandha 12 ochko bilan peshqadamligini saqlab qoldi. Uesli So 10 ochko bilan kuchli uchlikka yakun yasadi. To'rt nafar shaxmatchi 9 ochkodan jamg'ardi. 

Bugun blic, yani tezkor shaxmat bahslari boshlanadi. Uchrashuvlar bizning vaqt bilan soat 22:00da boshlanadi. Ilk turda Javohir qora donalarda amerikalik Levon Aronyan bilan hisob-kitob qiladi. Blicda vaqt nazorati 5+2 formatida bo'ladi. Rapid va blicda jamg'arilgan ochkolar jamlanmasiga ko'ra musobaqa g'olib va sovrindorlari aniqlanadi. 

Ishtirokchilarning to'liq tarkibi: Javohir Sindarov (O'zbekiston), Fabiano Karuano, Levon Aronyan, Uesli So, Lener Dominges, Avonder Liang (barchasi AQSH), Vinsent Keymer (Germaniya), Anish Giri, Yorden van Forest (ikkisi ham Niderlandiya), Rameshbabu Praggnanandha (Hindiston).