Magnus Karlsen - Superbet Poland Rapid & Blitz chempioni! Nodirbek Abdusattorov qanday natija qayd etdi?

Mukofot jamg'armasi 175 000 AQSH dollarini tashkil etgan ushbu musobaqada dunyoning kuchli 10 nafar grossmeysteri bosh sovrin uchun bahs olib bordi. Ikki kun davom etgan rapid turnirida xitoylik Vey I 13 ochko bilan g'oliblikni qo'lga kiritgandi. O'nta turda mag'lubiyatga uchramagan Magnus Karlsen 12 ochko bilan ikkinchi o'rinni egallagandi. 

Dunyo reytingida 5-o'rinni egallab turgan hamyurtimiz Nodirbek Abdusattorov esa 8 ochko jamg'arib, hindistonlik Erigaysi bilan 6-7 o'rinlarni bo'lishib olgan edi. Kecha esa turnirda blic bahslari ham yakuniga etdi. Blicning ikkinchi kuni ham xuddi birinchi kunida bo'lgani singari grossmeysterlar 9 ta turda o'zaro dona surishdi. 

Nodirbek blicning 3-turida qora donalarda o'ynashiga qaramay, jahon chempioni Magnus Karlsenni mag'lub etishga muvaffaq bo'ldi. Kecha Karlsen o'sha mag'lubiyat uchun revansh olib, muvozanatni tiklab qo'ydi. Aynan mana shu muhim g'alaba Magnus musobaqa chempionligini taqdim etdi. U rapid va blic yo'nalishlari jamlanmasida 26 ochko jamg'ardi. Xitoylik Vey I esa chempiondan bor yo'g'i 0,5 ochko ortda qoldi. Kuchli uchlikka mezbonlar vakili Yan-Kshishtof Duda 19,5 ochko bilan yakun yasadi. Ikkinchi va uchinchi o'rin o'rtasidagi farq 6 ochkoni tashkil etgani etiborga molik holat.    

Nodirbek Abdusattorov blicning ikkinchi kuni nisbatan yaxshiroq o'ynadi. Agar birinchi kuni ham shunday o'yin ko'rsatganida aniq sovrindorlar safidan joy olardi. Yosh jahon chempionimiz 17,5 ochko bilan 6-o'rinni egalladi. Blic yo'nalishida esa u 9,5 ochko bilan 5-o'rinni band etdi.  

Ishtirokchilar: Magnus Karlsen (Norvegiya, rapid 2828/blic 2886), Vey I (Xitoy, 2758/2684), Yan-Kshishtof Duda (Polsha, 2748/2766), Nodirbek Abdusattorov (O'zbekiston, 2733/2661), Rameshbabu Pragnanandha (Hindiston, 2704/2675), Anish Giri (Niderlandiya, 2687/2715), Arjun Erigaysi (Hindiston, 2671/2744), Dommaradju Gukesh (Hindiston, 2649/2651), Vinsent Kaymer (Germaniya, 2647/2610), Kirill SHevchenko (Ruminiya, 2622/2546).

Superbet Poland Rapid & Blitz yakuniy jadvali:

Rapid. 1. Vey I – 13; 2. Karlsen – 12; 3. Pragnanandxa – 10; 4-5. SHevchenko, Duda – 9; 6-7. Erigaysi, Abdusattorov – 8; 8-10. Kaymer, Gukesh, Giri – 7.

Blic. 1. Karlsen – 14; 2. Vey I – 12,5; 3. Duda – 10,5; 4. Erigaysi – 10; 5. Abdusattorov – 9,5; 6. Pragnanandxa – 9; 7. Giri – 7; 8-9. SHevchenko, Kaymer – 6; 10. Gukesh – 5,5.

Umumiy jadval. 1. Karlsen – 26; 2. Vey I – 25,5; 3. Duda – 19,5; 4. Pragnanandxa – 19; 5. Erigaysi – 18; 6. Abdusattorov – 17,5; 7. SHevchenko – 15; 8. Giri – 14; 9. Kaymer – 13; 10. Gukesh – 12,5.