Mang'itda zamonaviy bolalar suv sporti saroyi qurildi

Jismoniy tarbiya va sportni rivojlantirish jamg'armasi tomonidan barpo qilingan hududdagi ushbu beshinchi obektning ochilish marosimida davlat va jamoat tashkilotlari vakillari, sportchilar, yoshlar, jurnalistlar ishtirok etdi.

Mutaxassislarning fikricha, suzish inson organizmi uchun g'oyat foydali. Bu jarayonda tanadagi barcha mushaklar faol harakat qiladi, chiniqadi. Natijada qon aylanish tizimi yaxshilanadi. Suzish, ayniqsa, yosh organizmga quvvat beradi, immunitetni mustahkamlaydi. Suvda suzgan kishining asablari tinchlanib, kayfiyati ko'tariladi. SHu bois, 2017-2021 yillarda birgina Qoraqalpog'iston Pespublikasining 11 ta tumanidagi bolalar va o'smirlar sport maktablari qoshida yopiq suv havzalarini yangidan qurish rejalashtirilgan.

O'zbekiston Respublikasi Vazirlar Mahkamasining 2018 yil 2 iyundagi tegishli qarori asosida Jismoniy tarbiya va sportni rivojlantirish jamg'armasining manzilli dasturiga Qoraqalpog'iston uchun 5 ta obekt kiritilgan edi. Ushbu hujjat asosida Qorao'zak, CHimboy, Ellikqala tumanlari va Nukus shahrida zamonaviy yopiq suv havzalari qurildi.

– Amudaryo tumanida 2018 yil iyun oyida boshlangan ushbu obekt qisqa muddatlarda sifatli qurib bitkazildi, – deydi Qoraqalpog'iston Respublikasi jismoniy tarbiya va sport vaziri o'rinbosari Qahramon Reymov. – Ushbu yopiq suv havzasining smeta bahosi 4 milliard 876 million so'm. Obektda 11x25 metr o'lchamdagi suzish havzasi, murabbiy va shug'ullanuvchilar uchun yuvinish, kiyinish, dam olish xonalari hamda tomoshabinlar uchun o'rindiqlar mavjud.

Mazkur suzish havzasining foydalanishga topshirilishi tuman yoshlari uchun quvonchli voqea bo'ldi. Endilikda Bolalar va o'smirlar sport maktabida suzish to'garagi tashkil etilib, hududda suv sporti turlarini ommalashtirish, yoshlarning sog'lom ulg'ayishi uchun yanada keng sharoit yaratiladi.

Tadbirda O'zbekiston Pespublikasi jismoniy tarbiya va sport vaziri D.Nabiev ishtirok etdi.