Missiya bajarildi: Andijondan piyoda yo'lga chiqqan shovvozlar 1 800 kmdan oshiq yo'l bosib Mo'ynoqqa etib borishdi

Fevral oyining 15-sanasida Andijon shahridan yo'lga chiqishgan sayxunobodlik To'lqin Usmonov va Eldor Jo'raevlar Andijon, Farg'ona, Namangan, Toshkent viloyati, Toshkent shahri, Sirdaryo, Jizzax, Samarqand, Navoiy, Buxoro, Xorazm viloyatlari va nihoyat so'nggi manzil Qoraqalpog'iston Respublikasini ham piyoda bosib o'tishdi.

Ular roppa-rosa 40 kun davomida 1 812 km yo'l bosib bugun kunning ikkinchi yarmida Mo'ynoq shahriga etib borishdi. Ularni Qoraqalpog'iston Respublikasi Jismoniy tarbiya va sport vaziri G'ayrat Bayniyazov boshchiligidagi qoraqalpog'istonlik sportchilar va mahalliy aholi shodu xurramlik bilan kutib olishdi.

Murakkab ob-havo sharoitlariga qaramasdan o'z maqsadi yo'lidan og'ishmay, Mo'ynoqqacha piyoda borishga jahd qilgan yurtdoshlarimizga qoraqalpoq milliy to'nlari kiydirildi.

SHu erda tashkil etilgan tantanali marosimda so'zga chiqqanlar butun mamlakatimiz bo'ylab sog'lom turmush tarzini keng targ'ib qilgan bu ikki yurtdoshimiz shaniga iliq fikrlarni bildirishdi.