MOQ qoshida tashkil etilgan ilmiy-metodik markazning dastlabki faoliyati tahlil qilindi

Bugun O'zbekiston Milliy olimpiya qo'mitasida o'tkazilgan navbatdagi yig'ilishda MOQ qoshida tashkil etilgan ilmiy-metodik markazning dastlabki ishi ko'rib chiqildi.

Mazkur tadbirni MOQ prezidenti Rustam SHoabdurahmonov olib bordi. Unda, shuningdek, O'zbekiston Respublikasi Prezidenti administraciya sport sektorining rahbari SHavkat Sultonov, Jismoniy tarbiya va sport vazirining birinchi o'rinbosari Oybek Kasimov, MOQ vice-prezidenti Aziz Kamilov, federaciyalar rahbariyati, sport faxriylari, MOQ qoshidagi Respublika sport tibbiyoti ilmiy-amaliy markazi mutasaddilari va OAV xodimlari ham ishtirok etishdi.

“O'z mehnatini ayamayotgan barcha sport jonkuyarlariga o'z minnatdorchiligimni bildirib qolaman. Hozir terma jamoa vakillarining mashg'ulotlarini chuqur o'rganib, uni tahlil qilish bo'yicha Jismoniy tarbiya va sport vazirligi, MOQ, O'zbekiston davlat Jismoniy tarbiya va sport universiteti professorlaridan iborat ishchi guruh tuzilgan. Xorijda yig'in o'tkazayotgan terma jamoalarimizning faoliyati ham o'rganilmoqda. Ishchi guruhga o'sha joyning qanday yaxshi sharoiti bor, uni o'zimizda ham tatbiq qilsa bo'ladimi kabi jihatlarni o'rganish vazifasi yuklatilgan. Bunda faxriylarimizning yordami ham kerak. Aynan ularning boy tajribasi asosida o'zbek sportining ertasini yaratamiz”, – dedi Rustam SHoabdurahmonov.

Ish davomida tashkil etilgan ilmiy-metodik markazning dastlabki faoliyati, sport kurashlari bo'yicha terma jamoamiz vakillarining mashg'ulotlarini o'rganish natijasida qayd etilgan xulosalar tinglandi. Yig'ilish doirasida SHavkat Sultonov, Oybek Kasimov, sport faxriylari kengashi raisi Komiljon Xudoyberganov va pedagogika fanlari doktori, professor Fikrat Kerimov ham so'zga chiqib, o'zbek sportining taraqqiyotida yo'lga qo'yilgan ushbu qadamning o'rni xususida gapirib o'tishdi. SHuningdek, ilmiy-metodik markazning kelgusi faoliyatida etibor qaratilishi kerak bo'lgan jihatlar, uning ishini yanada sifatli va mukammal qilish borasida tegishli ko'rsatmalar berildi.