MOQ rahbari Tezkor shtab vakillari bilan uchrashdi

Ushbu tuzilmaga sport sohasida ulkan tajribaga ega bo'lgan malakali xodimlar jalb qilingan bo'lib, ular terma jamoalarimizning tayyorgarligi, mashg'ulotlar jarayoni kabi faoliyat turlarini tahlil qilib borishadi. Bugun MOQ raisi Rustam SHoabdurahmonov Tezkor shtab vakillari bilan uchrashuv o'tkazdi. Unda, shuningdek, MOQ raisi o'rinbosari, Tezkor shtab rahbari SHerzod Tashmatov va shtabning boshqa vakillari ishtirok etishdi.

Yig'ilishni MOQ raisi olib bordi va oldinda turgan ustuvor vazifalar xususida gapirib o'tdi.

“Tokio Olimpiadasiga ham kun sayin oz vaqt qolmoqda. Hademay licenzion musobaqalar ham boshlanadi. SHu bois terma jamoalarimizni ushbu turnirlarga har tomonlama puxta tayyorlash oldimizda turgan ustuvor vazifadir. Hukumatimizning qo'llab-quvvatlashi bilan jamoalarimizning Tokio Olimpiadasigacha bo'lgan barcha moliyaviy masalalari ijobiy hal qilingan. Bizdan o'z ishimizga masuliyat va temir intizom bilan yondashish talab qilinadi. Zero, xalqimiz va Prezidentimiz bizdan ulkan g'alabalar kutmoqda”, – dedi Rustam SHoabdurahmonov.

Suhbatda sportchilarimizni qiynayotgan ijtimoiy va boshqa masalalarni o'rganish, mashg'ulot jarayonining reja bo'yicha olib borilayotganini nazorat qilish, buning uchun barcha shart-sharoitlarni yaratish masalalariga ham to'xtalib o'tildi. O'z navbatida, SHerzod Tashmatov MOQ raisini shtab vakillarining faoliyati, ularning ish dasturlari bilan tanishtirdi. Yig'ilish davomida sport turlari bo'yicha biriktirilgan shtab xodimlarining ish rejalari tahlil qilinib, qo'shimcha takliflar bildirildi.