Mutal Nazarov Bishkekda "master klass" o'tkazdi, uning shogirdlari Jambuldagi musobaqada shohsupaga ko'tarildi

Ananaviy tarzda Ramazan Majenov tomonidan o'tkazib kelinayotgan "Jas Batyr" musobaqasida mezbonlardan tashqari qo'shni davlatdan kelgan 300 nafarga yaqin karatechilar bir nechta yosh hamda vazn toifasida medallar uchun bahs olib borishdi. 

Xalqaro turnirda Toshkent shahri jamoasi ham qatnashdi. Yakunda poytaxtlik karatechilar 3 ta medal bilan vatanga qaytishdi. Temur Erkinov oltin, Oleg Magdyug kumush, SHohsanam Muhammadieva esa bronza medaliga sazovor bo'ldi. Musobaqada Mutal Nazarov hakam sifatida ishtirok etdi. 

Karatechilarimizning ustozi, NUR-HAS karate markazi murabbiyi, Jahon karate tashkiloti tomonidan tayinlangan vakili Bran-chif Mutal Nazarov musobaqa yakunlanganidan keyin ikki kun davomida Qirg'iz Respublikasi poytaxti Bishkek shahrida SHinkiokushinkay karate bo'yicha xalqaro seminarda ishtirok etdi va yosh karatechilarga master klass, yani mahorat saboqlarini o'tkazib berdi. Nazarov qirg'izistonlik qora belbog' 1-DAN sohibi Sergey SHevchenko yordam berdi. 

Ushbu xalqaro seminarni o'tkazishdan ko'zlangan asosiy maqsad Markaziy Osiyoda SHinkiokushinkay karateni yanada rivojlantirishdan iborat edi. To'rt nafar murabbiy-instruktor tomonidan ellikdan ziyod yosh karatechilarga kixon, ido, kata va kumite bo'yicha saboq berildi. 

Kelasi oy seminar ishtirokchilari DAN uchun imtihon topshirishadi. Xalqaro seminar yakunida ikki davlat o'rtasida hamkorlik memorandum imzolandi. Mutal Nazarov qirg'izistonlik murabbiy do'stlari bilan ikki mamlakat sportchilari o'rtasida chempionlar musobaqasini o'tkazishga kelishib olishdi.  

Yana bir malumot, Mutal Nazarov 30 may - 6 iyun kunlari Yaponiya poytaxti Tokio shahrida o'tkaziladigan fullkontakt karate bo'yicha jahon chempionatida yurtimiz nomidan yagona vakil sifatida ishtirok etadi. Ushbu musobaqada dunyoning 106 davlatidan karatechilarning qatnashishi kutilmoqda.