Nadal 19 yoshida o'ynagan va chempion bo'lgan turnirida oradan 19 yil o'tib kortga chiqdi

Ispaniyalik tennis afsonasi SHveciyaning Bostad shahrida o'tkazilayotgan ATP turnirida muvaffaqiyatli start oldi. ATP reytingida 261-o'rinni egallab turgan Nadal ilk davrada mezbonlar vakili, dunyoning 461-raketkasi Leo Borgni mag'lubiyatga uchratdi - 6/3, 6/4.

Bu tennischilarning o'zaro o'tkazgan ilk uchrashuvi edi. Sakson besh daqiqa davom etgan bahsda Nadal 5, Borg 2 ta eys zarbasini amalga oshirgan. Breyklar bo'yicha ustunlik 2 ga 0 ko'rinishida Rafa foydasiga hal bo'ldi. 

Qizig'i, Nadal Bostaddagi turnirda so'nggi bor 2005 yilda, 19 yoshida ishtirok etgan va o'shanda u bosh sovrinni qo'lga kiritgandi. Endi Rafael Nordea Open turnirining ikkinchi bosqichida britaniyalik Kemeron Norriga qarshi kortga chiqadi.

Malumot uchun, grunt qiroli hisoblangan Rafael Nadal so'nggi bor 27 may kuni "Rolan Garros" turnirining ilk davrasida dunyoning to'rtinchi raketkasi, germaniyalik Aleksandr Zverevga imkoniyatni boy berib qo'ygandi - 3/6, 6/7(5), 3/6.