Nodirbek Abdusattorov 3-o'rinni egallagan turnirda chempion aniqlandi

Umumiy mukofot jamg'armasi 500 000 AQSH dollarini tashkil etgan ushbu musobaqaning final bosqichida dunyoning sakkiz nafar kuchli grossmeysteri bosh sovrin uchun bahs olib bordi. Ular qatorida hamyurtimiz Nodirbek Abdusattorov (2727) ham muvaffaqiyatli ishtirok etib, yakunda 1/2 finalga qadar etib borgan holda 3-o'rinni egalladi. 

Hal qiluvchi final uchrashuvining birinchi setida amaldagi jahon chempioni Magnus Karlsen amerikalik Uesli Soni 2,5:1,5 hisobida mag'lubiyatga uchratgan edi. Ikkinchi setda ham scenariy o'zgarmadi. Norvegiyalik grossmeyster xuddi birinchi setda bo'lgan hisobda zafar quchib, musobaqa g'olibiga aylandi. 

Magnus Karlsen ushbu turnirning uch karra chempioni bo'lish barobarida 200 000 AQSH dollari miqdoridagi mukofot pulini ham qo'lga kiritdi. Vice-chempion Uesli So esa 100 000 dollarga ega chiqdi. Uchinchi o'rinni egallagan hamyurtimiz Nodirbek Abdusattorov esa 50 000 dollarni o'z hisob raqamiga yozib qo'ydi.