Nodirbek Abdusattorov guruh bosqichida eng ko'p ochko to'pladi. Uning 1/2 finaldagi raqibi malum

Mukofot jamg'armasi 400 ming AQSH dollarini tashkil etuvchi ushbu nufuzli turnirda guruh bosqichi yakunlanib, 1/2 final juftliklari malum bo'ldi. Abdusattorov islandiyalik Xyorvar Steyn Gretarsson, rossiyalik FIDE bayrog'i ostida dona surayotgan Yan Nepomnyashiy va AQSH vakili Uesli Soni mag'lub etib, muddatidan avval yarim finalga yo'l olgandi. 

Kecha tunda o'tkazilgan partiyalarda Nodirbek Nepomnyashiyni yana ikki bor mag'lubiyatga uchratdi. Uesli So bilan takroriy bahslarda bitta durang va mag'lubiyat qayd etdi hamda 10 ochko bilan guruh g'olibi sifatida 1/2 finalga yo'l oldi. Yan Nepomnyashiy 7 ochko bilan ikkinchi yarim finalchiga aylandi. 

Etiborga molik jihati shundaki, Nodirbek Abdusattorovguruh bosqichida eng ko'p ochko jamg'argan shaxmatchi bo'ldi. Amaldagi jahon toji sohibi Magnus Karlsen 9 ochko bilan B guruhida 1-o'rinni egalladi. Amerikalik Xikaru Nakamura ham 9 ochko jamg'ardi va qo'shimcha ko'rsatkichlarga ko'ra guruhda ikkinchi bo'ldi. 

Bugun musobaqada dam olish kuni. Ertaga yarim final uchrashuvlari o'tkaziladi. A guruhi g'olibi Nodirbek Abdusattorov B kvartetida ikkinchi o'rinni band etgan Xikaru Nakamuraga qarshi dona suradi. Ikkinchi yarim final juftligida Magnus Karlsen va Yan Nepomnyashiy uchrashishadi.  

World Fischer Random Chess Championship. 1/2 final

Nodirbek Abdusattorov (O'zbekiston) - Xikaru Nakamura (AQSH)

Yan Nepomnyashhiy (FIDE) - Magnus Karlsen (Norvegiya)