Nodirbek Abdusattorov: “Ikkinchi o'yinda Magnusning imkoniyatlarini past baholadim”

Saralash bahslari yakunlariga ko'ra kuchli to'rtlikdan joy olgan Abdusattorov yarim finalda hindistonlik Arjun Ergaisini 2,5:0,5 hisobida mag'lubiyatga uchratdi. Finalda esa jahonning birinchi raqamli shaxmatchisi, norvegiyalik afsona Magnus Karlsenga 1,5:2,5 hisobida imkoniyatni boy berib qo'ydi. 

“Natijamdan juda xursandman. Saralash bosqichida tay-breklar tomondan omad ham bo'ldi. Eng asosiysi  Top-4`ga kirishning o'zi juda katta omad. Finalga chiqqanimdan ham xursandman, oxirigacha bor kuchimni berdim. Rostini aytsam, g'olib bo'lishimga ozgina qoldi,” — dedi Nodirbek.

Pley-offga chiqish formatiga to'xtalib, u shunday fikr bildirdi: “Agar 8 ta yo'llanma bo'lsa, albatta osonroq bo'lardi. Top-4 tizimi bazan juda keskin va biroz "tasodifiy" ham bo'lib ketadi. Buni muxlislar o'zi his qilsa ham bo'ladi”.

Finaldagi burilish nuqtalari haqida esa Nodirbek ochiq gapirdi: “O'zimni yaxshi his qilayotgandim. Ikkinchi o'yinda uning imkoniyatlarini past baholadim — poziciya durangga yaqin edi, lekin u juda aniq o'ynadi. Oxirgi o'yinda ham vaziyat keskin edi: tashabbus uchun piyoda qurbonlik qildim, ammo aniq davomni topa olmadim. Endshpil menga biroz qiyinroq edi va u oxirida o'z imkoniyatidan foydalandi. Magnusni tabriklayman”.