Nodirbek Abdusattorov: "Magnus har safar menga qarshi o'yinga kechikib keladi"

Uchrashuvdan so'ng hamyurtimiz bahs tafsilotlari va Magnusning "psixologik o'yinlari" haqida gapirib berdi.

Nodirbek o'yinni shunday tarifladi:

"Bu juda yuqori sifatli partiya bo'ldi. Balki tomoshabop bo'lmagandir, lekin juda mustahkam o'ynadik. Magnus debyutda kutilmagan Qc2 yurishi bilan meni hayron qoldirdi. Ochig'ini aytsam, o'yin biroz sokin va zerikarli kechdi, biroq elita darajasidagi shaxmat kurashi mana shunday bo'ladi".

Turnirning qiziq nuqtasi Magnus Karlsenning o'yinga deyarli o'n daqiqa kechikib kelgani bo'ldi. Nodirbek bunga xotirjam munosabat bildirdi:

"U menga qarshi o'ynaganda doim shunday qiladi. Vaysenxausda ham tur boshlanib bo'lganidan keyin kelgan edi. Lekin bu meni zarracha ham hayajonga solmay qo'ygan. Uning odatlarini, holatlarga bo'lgan munosabatini yaxshi bilaman. Bu uning tanlovi, bunaqa odatlariga shunchaki etibor bermayman".

Nodirbek hozirgi sport formasi haqida gapirar ekan, kechagi o'yindagi xatosini eslab o'tdi:

"O'zimni yaxshi his qilyapman, lekin kechagi o'yin meni hali ham qiynayapti. Kamida ikki marta yutuqli poziciyaga chiqib, g'alabani qo'ldan chiqardim. Rxf7 yurishi barcha ustunligimni yo'qqa chiqardi. Bor-yo'g'i 7 ta turdan iborat turnirda bunday imkoniyatlardan foydalana olmaslik juda alamli".