Nodirbek Abdusattorov o'zbek shaxmatchilari orasida yana bir tarixiy natija qayd etdi

Quvonarlisi, tarixda ilk bor o'zbek shaxmatchisi dunyo reytingining Top-4'taligiga kirdi. Aslida 19 yoshli Nodirbek Abdusattorov fevral oyidayoq Top-10`talikka kirib, o'zbek shaxmatchilari uchun rekordni yangilagan edi. Uning o'zi kecha elon qilingan yangi reytingda o'sha rekordni yangilab qo'ydi. Bungacha o'zbek shaxmatidagi eng yaxshi natija Rustam Qosimjonovga tegishli bo'lib, u 2715 ochko bilan jahon reytingida 11-o'rinda qayd etilgandi. 

Yaqinda Prague Chess Festival g'olibi bo'lgan Nodirbek 2765 ochko bilan 4-o'ringa ko'tarildi. Bu Top-10`talikdagi eng katta o'sish bo'ldi. Reytingni hamon jahon chempioni Magnus Karlsen boshqarmoqda. Norvegiyalik grossmeyster Samarqandda o'tgan rapid va blic yo'nalishi bo'yicha FIDE jahon chempionatida g'oliblikni qo'lga kiritib, har ikki yo'nalishda o'z chempionligini himoya qilgandi. 

Amerikalik grossmeysterlar Fabiano Karuana yangilangan reytingda ikkinchi, Hikaru Nakamura uchinchi o'rinni band etgan. Top-10`talikdan Ding Liren (Xitoy), Alireza Firuzja (Franciya), Yan Nepomnyashiy (Rossiya), Uesli So (AQSH), Arjun Erigaisi (Hindiston) va Yi Vey (Xitoy) joy olgan. Vishvanatan Anand 11-o'rinda qayd etilgan.    

Yangilangan FIDE reytingi (Top-10):

1. Magnus Karlsen (Norvegiya, 2830)

2. Fabiano Karuana (AQSH, 2803)

3. Hikaru Nakamura (AQSH, 2789)

4. Nodirbek ABDUSATTOROV (O'zbekiston, 2765)

5. Ding Liren (Xitoy, 2762)

6. Alireza Firuzja (Franciya, 2760)

7. Yan Nepomnyashiy (Rossiya, 2758)

8. Uesli So (AQSH, 2757)

9. Arjun Erigaisi (Hindiston, 2756)

10. Yi Vey (Xitoy, 2755)

O'zbek shaxmatchilarining reytingdagi o'rni:

4. Nodirbek Abdusattorov (2765)

48. Rustam Qosimjonov (2685)

50. Javohir Sindarov (2684)

69. Nodirbek Yakubboev (2665)