Nodirbek Abdusattorov Superbet Poland Rapid & Blitz turniridan qancha gonorar ishlab oldi? Qolganlarchi?

Mukofot jamg'armasi 175 000 AQSH dollarini tashkil etgan ushbu musobaqada dunyoning kuchli 10 nafar grossmeysteri bosh sovrin uchun bahs olib bordi. Ikki kunlik rapid turnirida xitoylik Vey I, blicda esa Magnus Karlsen birinchi o'rinni egalladi. Ikki musobaqa yakunlariga ko'ra umumiy hisobda Magnus Karlsen musobaqa g'olibiga aylandi. 

Norvegiyalik jahon chempioni bosh sovrin bilan birga 40 000 AQSH dollari miqdoridagi mukofot pulini ham qo'lga kiritdi. Ikkinchi o'rinni egallagan xitoylik Vey 30 000, kuchli uchlikka yakun yasagan mezbon shaxmatchi Yan-Kshishtof Duda 25 000 dollarga ea chiqdi. Eng oxirgi o'rindagi hindistonlik Gukesh o'z hamyonini 7 000 dollarga boyitib oldi.  

Dunyo reytingida 5-o'rinni egallab turgan hamyurtimiz Nodirbek Abdusattorov esa 11 000 AQSH dollari miqdoridagi mukofot puliga ega bo'ldi. Hamyurtimiz rapidda 8 ochko jamg'arib, hindistonlik Erigaysi bilan 6-7 o'rinlarni bo'lishib olgan edi. Blic bahslarida esa 9,5 ochko bilan 5-pog'onadan joy oldi. Yosh jahon chempionimiz umumiy jadvalda 17,5 ochko bilan 6-o'rinni egalladi.