Nodirbek Abdusattorov yana bir bor Magnus Karlsenga qarshi dona surdi

Mukofot jamg'armasi 150 ming AQSH dollarini tashkil etuvchi mazkur turnirda sayyoramizning eng kuchli grossmeysterlari ishtirok etyapti. Ular orasida hamyurtimiz, rapid yo'nalishi bo'yicha amaldagi va shu bilan birga eng yosh jahon chempioni Nodirbek Abdusattorov (2651) ham bor.

Quvonarlisi, kecha o'tkazilgan 4 ta partiyada Abdusattorov hech bir raqibiga yutqazmadi. Yana bir muhim jihat, jahon tojdori Magnus Karlsen (2865) bu safar ham yosh grossmeysterimizni mag'lub eta olmadi. Karlsenga qarshi qora donalarda harakat qilgan Nodirbek durang natija qayd etdi. Aynan Magnus ushbu musobaqaning amaldagi g'olibi hisoblanadi. 

Abdusattorov musobaqadagi ishtirokini niderlandiyalik Anish Giri (2772)ga qarshi bahs bilan boshladi. Ushbu partiyada tomonlar murosaga kelishdi. Ikkinchi turda Karlsen - Abdusattorov uchrashuvi bo'lib o'tdi. Uchinchi turda hamyurtimiz oq donalar rossiyalik Vladislav Artemev (2700) bilan durang o'ynadi. To'rtinchi turda esa yana bir rus grossmeysteri Andrey Esipenko (2714) bilan murosaga keldi. 

SHu tariqa, birinchi kungi bahslarda Nodirbek Abdusattorov yomon taassurot qoldirmadi. Bugun yosh grossmeysterimiz 5-turda rossiyalik Yan Nepomnyashiy (2773) bilan qora donalarda o'ynaydi. Oltinchi turda ayollar o'rtasida 12-Jahon chempioni, rossiyalik Aleksandra Kostenyuk (2516) bilan uchrashadi. 

Malumot uchun, 16 xalqaro grossmeyster ishtirokidagi musobaqa rapid yo'nalishida o'tkazayotgan bo'lib, dastlab ishtirokchilar 15 turdan iborat saralash bosqichida o'zaro kuch sinashadi. SHaxmatchilar to'plagan har bir ochkosi uchun 250 dollardan mukofot olishadi. Saralash bosqichi yakuniga ko'ra eng yaxshi natija qayd etgan 8 nafar shaxmatchi pley-off bosqichida g'oliblik uchun kurash olib boradi. Bu bosqichda har bir o'yin muhim ahamiyatga ega va yutqazgan shaxmatchi uchun musobaqa tugaydi.

Eslatib o'tamiz, yaqinda Polshada o'tkazilgan jahon chempionatida Nodirbek Abdusattorov Magnus Karlsenni shov-shuvli tarzda mag'lubiyatga uchratgan edi. O'sha g'alaba tasodifiy bo'lmagani kechagi uchrashuvda o'z isbotini topdi.