Nodirbekdan kambek! O'zbekiston Jahon chempionatining rapid bahslarini nechanchi o'rinda yakunladi?

Dunyoning 55 jamoasi ishtirok etayotgan ushbu nufuzli musobaqada O'zbekiston terma jamoasi ham kuchli tarkibda sovrinli o'rinlar uchun bahs olib bormoqda. Tarkibda Rustam Qosimjonov, Nodirbek Abdusattorov, Javohir Sindarov, SHamsiddin Vohidov singari etakchi grossmeysterlarimiz bor.   

Jamoaviy jahon chempionatining umumiy mukofot jamg'armasi 500 000 evro bo'lib, rapid uchun 310 000, blic uchun esa 190 000 evro ajratilgan. Musobaqaning dastlabki uch kuni rapid bo'yicha 12 ta tur uchrashuvlari o'tkazildi. Terma jamoamiz kecha hal qiluvchi uchinchi kungi bahslarda 2 g'alaba, 1 tadan durang va mag'lubiyat qayd etdi. So'nggi 12-turning oxirgi uchrashuvida Nodirbek Abdusattorov dahshatli kambekni amalga oshirdi. Reytingda o'zidan yuqori franciyalik Alireza Firuzdjaga qarshi durang yoki mag'lubiyatga qarab borayotgan bahsni g'alabaga aylantirib yubordi. Bu esa Hikaru Nakamura, Uesli So, Maksim Vashe-Lagrav, Aleksandra Kostenyuk singari mashhur shaxmatchilarga ega WR Chess Team jamoasining 3,5:2,5 hisobida taslim etilishiga sabab bo'ldi.   

SHu tariqa, O'zbekiston terma jamoasi Global Ramblers 5:1, Isroil terma jamoasi 4,5:1,5 hisobida mag'lub etildi. Malcolm's Mates va Hexamind jamoalari bilan 3:3 hisobidagi jangovar durangga imzo chekdik. Tarkibiga mashhur grossmeysterlarni jamlagan Hexamind jamoasiga qarshi bahsda Javohir Sindarov amaldagi chempion Volodar Murzinni, Nodirbek Abdusattorov esa Levon Aronyanni mag'lub etishni uddaladi. Rustam Qosimjonov va SHamsiddin Vohidov o'z partiyalarini durang bilan yakunlashdi. Afsuski, Afruza Hamdamova va Nilufarxon Imomqo'zieva raqiblariga yutqazib qo'yishdi. 

SHu tariqa, O'zbekiston terma jamoasi rapid bahslarini 7 g'alaba, 3 durang, 2 mag'lubiyat bilan 17 ochko to'plagan holda qo'shimcha ko'rsatkichlarga ko'ragina 4-o'rinda yakunladi. Biz kabi 17 ochko jamg'argan Freedom jamoasi qo'shimcha koeficentlarga ko'ra bronza medalini qo'lga kiritdi. Team MGD1 jamoasi 21 ochko bilan rapid bo'yicha jahon chempioniga aylandi. Hexamind Chess Team jamoasi 20 ochko bilan kumush medallarga ega chiqdi. 

Darvoqe, O'zbekiston terma jamoasi 30 000 evro miqdorida mukofot pulini ham qo'lga kiritdi. Bugun jahon chempionatining jamoaviy blic bahslari boshlanadi. Jamoalar 4 ta guruhda bahslarga kirishishadi. Har bir guruhdan eng yaxshi natijaga erishgan 4 jamoa pley-off bosqichiga yo'llanmani qo'lga kiritadi. 

O'zbekiston terma jamoasi qura natijasiga ko'ra, S guruhida Duobeniajan Costa Calida ESJ, Youth KG, Berlin Chess Federation, Wood Green Youth, Rookies, Chess Rising Stars, e-therapeutics, Generation XYZA, ANI, OlalaStars, Germany and Friends va Mongolia-B jamoalariga qarshi bahs olib boradi.