"Nomzodlar turniri". Karuanani mag'lub etgan Sindarov 4-turning eng yaxshi shaxmatchisi!

Xabar berganimizdek, kecha musobaqaning 4-turida amaldagi Jahon Kubogi g'olibi Javohir Sindarov uchinchi g'alabasini tantana qilgandi. Hamyurtimiz oq donalarda asosiy raqibi, 4-turga qadar o'zi singari 2,5 ochkoga ega bo'lib turgan, dunyoning amaldagi uchinchi raqamli shaxmatchisi amerikalik Fabiano Karuanani mag'lub etishning uddasidan chiqdi. Ushbu g'alabadan so'ng Javohir 4 imkoniyatdan 3,5 ochko to'plab, turnir jadvalida yakka peshqadam bo'lib oldi. Karuana 2,5 ochko bilan 2-o'rinni saqlab qoldi. 

To'rtinchi turda Anish Giri ham g'alabaga erishdi. Niderlandiyalik shaxmatchi qora donalarda o'ynaganiga qaramay, FIDE bayrog'i ostidagi rossiyalik Andrey Esipenkoni taslim eta oldi. Qolgan ikki partiyada kuchlar teng keldi. Rameshbabu Praggnanandha, Mattias Blubaum va Anish Giri 2 ochko bilan kuchli beshlikni yakunlab turibdi. 

Etiborga molik jihati shundaki, Javohir Sindarov 3-turda bo'lgani singari 4-turning ham eng yaxshi shaxmatchisi deb topildi. Bugun turnirda dam olish kuni sifatida elon qilingan. Ertaga 5-turda Javohir Sindarov qora donalarda yana bir amerikalik grossmeyster Hikaru Nakamuraga qarshi bahs olib boradi. 

Malumot uchun, Sindarov Jahon toji uchun o'ynash imkoniyatini beradigan turnirda ishtirok etayotgan birinchi o'zbek shaxmatchisi hisoblanadi. O'n to'rt turdan iborat mazkur turnir g'olibi jahon toji uchun hindistonlik Gukesh Dommarajuga qarshi dona suradi.