"Nomzodlar turniri". Sindarov 3-turda Praggni mag'lub etdi va peshqadamligini saqlab qoldi

Xabar berganimizdek, musobaqada amaldagi Jahon Kubogi g'olibi hamyurtimiz Javohir Sindarov ham muvaffaqiyatli ishtirok etyapti. Grossmeysterimiz ilk turda rossiyalik Andrey Esipenkoni mag'lub etib, ikkinchi turda germaniyalik Mattias Blubaum bilan murosaga kelgandi. 

Uchinchi turda esa qora donalarda o'ynaganiga qaramay, o'zi singari 1,5 ochkoga ega bo'lib turgan hindistonlik Rameshbabu Praggnanandhani chiroyli tarzda taslim etishga muvaffaq bo'ldi. Bu turda amerikalik Fabiano Karuana ham zafar quchdi. U oq donalarda o'ynab, xitoylik Vey Yini mag'lubiyatga uchratdi. Qolgan ikki partiyada tomonlar murosaga kelishdi. Blubaum Esipenko, Hikaru Nakamura niderlandiyalik Anish Giri bilan durang o'ynadi. 

Etiborga molik jihati shundaki, Javohir Sindarov 3-turning eng yaxshi shaxmatchisi deb topildi. Bu g'alabadan keyin hamyurtimiz 2,5 ochko bilan qo'shimcha ko'rsatkichlarga ko'ra turnir jadvalidagi peshqadamligini saqlab qoldi. Fabaino Karuana hisobida ham 2,5 ochko bo'lib, u ikkinchi o'rinni band etgan. Javohirga yutqazgan Rameshbabu Praggnanandha 1,5 ochko bilan kuchli uchlikka yakun yasagan. Blubaum hisobida ham 1,5 ochko bor. Qolgan to'rt grossmeyster 1 ochkodan to'plashgan. 

Bugun Javohir Sindarov 4-turda oq donalarda asosiy raqibiga aylanib qolgan Fabiano Karuanaga qarshi bahs olib boradi. Bu tur partiyalari ham bizning vaqt bilan soat 17:30da boshlanadi. Javohir Jahon toji uchun o'ynash imkoniyatini beradigan turnirda ishtirok etayotgan 1-o'zbek shaxmatchisi hisoblanadi. O'n to'rt turdan iborat mazkur turnir g'olibi jahon toji uchun hindistonlik Gukesh Dommarajuga qarshi dona suradi.