"Nomzodlar turniri". Sindarov ketma-ket uchinchi marta turning eng yaxshi shaxmatchisi!

Xabar berganimizdek, kecha musobaqaning 5-turida amaldagi Jahon Kubogi g'olibi Javohir Sindarov musobaqadagi to'rtinchi, qatorasiga uchinchi g'alabasini tantana qildi. Hamyurtimiz qora donalarda o'ynaganiga qaramay, reytingda o'zidan yuqorida borayotgan amerikalik Hikaru Nakamurani mag'lubiyatga uchratdi. 

Etiborlisi, Javohir Sindarov tashkilotchilar tomonidan qatorasiga uchinchi bor turning eng yaxshi shaxmatchisi deb topildi. U uchinchi va to'rtinchi turlarda ham eng yaxshi bo'lgandi.  

Dunyoning amaldagi uchinchi raqamli shaxmatchisi, 4-turda Javohirga yutqazgan amerikalik Fabiano Karuana 5-turda oq donalarda germaniyalik Mattias Blubaumni taslim etdi va Sindarov bilan o'rtadagi 1 ochkolik tafovutni saqlab qoldi. 

Kechagi g'alabadan so'ng Javohir 5 imkoniyatdan 4,5 ochko to'plab, turnir jadvalida yakka peshqadamligini davom ettirmoqda. Karuana 3,5 ochko bilan 2-o'rinni saqlab qoldi. Kecha 5-turdagi qolgan ikki partiyada kuchlar teng keldi. Niderlandiyalik Anish Giri xitoylik Vey Yi bilan, hindistonlik Rameshbabu Praggnanandha rossiyalik Andrey Esipenko bilan durang o'ynadi.  

Bugun 6-turda Javohir Sindarov qora donalarda xitoylik grossmeyster Vey Yiga qarshi bahs olib boradi. Fabiano Karuana oq donalarda Andrey Esipenko bilan hisob-kitob qiladi. Hikaru Nakamura Rameshbabu Praggnanadha bilan to'qnash keladi. 

Malumot uchun, Sindarov Jahon toji uchun o'ynash imkoniyatini beradigan turnirda ishtirok etayotgan birinchi o'zbek shaxmatchisi hisoblanadi. O'n to'rt turdan iborat mazkur turnir g'olibi jahon toji uchun hindistonlik Gukesh Dommarajuga qarshi dona suradi.