Og'ir vazn kelajagi sifatida etirof etilgan Mozes Itaumani chuqur nokautga uchratishdi

Oqshomning markaziy jangida 21 yoshli britaniyalik Mozes Itauma xorvatiyalik 34 yoshli Filip Xrgovichga imkoniyatni boy berdi. Itauma jangni juda faol boshladi va ikkinchi raunddayoq raqibini nokdaun holatiga tushirdi. To'rtinchi raundda xorvatiyalik bokschi qarshilik ko'rsata boshladi, beshinchi raunddan esa jang surati pasayib, tenglashdi va tashabbus vaqti-vaqti bilan Xrgovichga o'ta boshladi. Itauma tezlik bo'yicha ustunlikni saqlab qoldi, aniqroq va xavfliroq harakat qildi, raqibining iyak qismiga bir necha bor zarba berdi, biroq uni jiddiy tarzda larzaga sola olmadi.

Sakkizinchi raundning so'nggi daqiqasida Itauma uzoq davom etgan hujumga borib, kuchini sarflab qo'ydi. Bunga bardosh bergan Xrgovich qarshi hujumga o'tdi. To'qqizinchi raund ham xorvatiyalik bokschining hujumlari bilan boshlandi. Itauma xavfli qarshi zarbalar berdi, ammo raqibini jiddiy shikastlay olmadi. Ushbu uch daqiqalikning oxiriga kelib, holdan toygan britaniyalik qo'llarini ko'tara olmay qoldi, gandiraklab, arqonlarga suyanib qoldi. Buni ko'rgan uning sekundantlari, hakam jangni to'xtatishga hozirlik ko'rayotgan bir paytda, ringga sochiq tashlashdi.

Rasmiy natija — to'qqizinchi raundning 2-daqiqasi 27-soniyasida Filip Xrgovich nokaut evaziga g'alaba qozondi. Xrgovich og'ir vazn toifasida vakant bo'lib turgan IBF kamarini qo'lga kiritib, Xorvatiya tarixidagi ilk jahon chempioniga aylandi.

"Men har bir raundda yutqazayotgan edim, raqibim mendan ustunroq boks ko'rsatayotgan edi. G'alaba qozonish uchun kuchni qaerdan olganimni o'zim ham bilmayman", — dedi Xrgovich jangdan keyingi intervyusida.