Olimpiya o'yinlari afsonalari: Norvegiyalik vampir

Bugun qishki Olimpiya o'yinlari afsonalaridan biri, norvegiyalik biatlonchi Ule-Eynar Byorndalen haqida hikoya qilamiz.

Ule-Eynar Byorndalen 1974 yil 27 yanvar kuni Norvegiyaning Drammen shahrida tavallud topgan. O'zining chang'idagi yuqori tezligi, merganlik mahorati bilan minglab muxlislar ko'ngliga kirib bordi. Uzoq yillik faoliyati davomida Ule-Eynar «Biatlon qiroli», «Buyuk va daxshatli», «Norvegiyalik vampir», «Qizil iblis», 40 yashar yigit kabi laqablar bilan tanilgan. Unda qadimiy skandinav ovchilarining qoni oqadi, degan tariflar ham uchrab turadi. Byorndalen 5 ta Olimpiya o'yinlarida 8 ta oltin, 4 ta kumush va 1 ta bronza medallariga egalik qilgan. Jahon chempionatlarining o'zida esa 20 ta oltin, 14 ta kumush va 11 ta bronza medallarini qo'lga kiritgan. 2014-2016 yillar davomida Xalqaro Olimpiya qo'mitasi azosi bo'lgan.

Byorndalen biatlon musobaqalarida Jahon kuboklarida qo'lga kiritilgan g'alabalar , eng ko'p startlar va boshqa bir qator yo'nalishlarda mutlaq rekordchi sanaladi. Uning qanchalik buyuk sportchilardan biri ekanligini 40 yoshida Sochi Olimpiadasining sprint yo'nalishida zafar quchganining o'ziyoq ifodalab turibdi.

Norvegiyalik afsona o'ziga umr yo'ldosh tanlashda ham biatlondan uzoqqa ketmagan. Byorndalen 2016 yil Belarus qahramoni, o'zi kabi mashhur biatlonchi, 4 karra Olimpiada chempioni Darya Domracheva bilan oila qurdi va hozirda 1 qizi bilan shodu xurramlikda hayot kechirishmoqda.