Olmaliqda Jismoniy tarbiya va sport boshqarmasi kubogi uchun musobaqa o'tkazildi

O'zbekiston Respublikasi Prezidentining 2017 yil 3 iyundagi “Jismoniy tarbiya va ommaviy sportni yanada rivojlantirish chora-tadbirlari to'g'risida”gi PQ-3031-qarori, Prezidentimiz tomonidan ilgari surilgan beshta muhim tashabbusning ikkinchi tashabbusi ijrosini taminlash bo'yicha yoshlarni sportga keng jalb etishni, O'zbekiston Respublikasi Bosh vazirining 2019 yil 31 maydagi 1-sonli va 2019 yil 8 oktyabrdagi 9-sonli yig'ilish bayoni ijrosini taminlash maqsadida o'tkazilgan mazkur musobaqada viloyat jismoniy tarbiya va sport boshqarmasi, ushbu boshqarma tizimidagi CHirchiq ixtisoslashtirilgan olimpiya zaxiralari maktab-internati, sportning yakkakurash turlari bo'yicha ixtisoslashtirilgan bolalar-o'smirlar sport maktabi, barcha bolalar-o'smirlar sport maktablarining direktor va o'rinbosarlari, metodistlari hamda murabbiylaridan iborat yigirmata jamoa ishtirok etdi. 

Qiziqarli va murosasiz o'tgan bellashuvlar olimpiya qoidalariga muvofiq tashkil etildi. Ayniqsa, musobaqaning yarim final va final o'yinlari shiddatli tus oldi. Uchinchi o'rin uchun Bo'ka va Bekobod tumanlari o'zaro kuch sinashishdi va 3:2 hisobi bilan Bo'ka tumani bolalar-o'smirlar sport maktabi jamoasi ustunlikka erishib, bronza medallarini qo'lga kiritishdi. 

Faxrli birinchi o'rin uchun CHirchiq IOZMI hamda Yuqorichirchiq BO'SM jamoalari o'zaro to'qnash kelishdi. Futzalda anchayin mahoratli bo'lgan CHirchiq IOZMI jamosining qo'li baland keldi. Ular raqiblarini 4:3 hisobida mag'lub etib, bosh sovrin - kubokni qo'lga kiritdi va chempionlikni tantana qilishdi. 

SHuningdek, musobaqada turli nominaciyalar bo'yicha ham eng yaxshilar aniqlandi. Unga ko'ra “Eng yaxshi jamoa” deb Zangiota tumani bolalar-o'smirlar sport maktabi jamoasi topildi. “Eng yaxshi to'purar”da bir o'yinda to'qqizta gol urgan Olmaliq shahar bolalar-o'smirlar sport maktabi direktori Ozod Hasanov loyiq ko'rildi. “Eng faol jamoa” nominaciyasi Toshkent tumani bolalar-o'smirlar sport maktabi jamoasiga nasib etdi.

Bellashuvlar yakuniga etgach, tantanali taqdirlash marosimi tashkil etildi. Marosimda ishtirok etgan Toshkent viloyati jismoniy tarbiya va sport boshqarmasi boshlig'i vazifasini bajaruvchi Azamat Turobov g'olib va sovrindorlarni qutlab, jamoalarga diplom, medal, kubok va esdalik sovg'alarini topshirdi.      

Ilhom RAHMONOV tayyorladi