“Osiyo bolalari-2022”: hamyurtlarimizning bugungi natijalari qanday bo'ldi? (+medallar reytingi)

Uch kunlik musobaqalar sarhisobi bizga nima berdi? Ko'zlangan medallar qo'lga kiritildimi?

Ochig'i, 10tadan oshiq davlat, Rossiya Federaciyasining 8ta alohida hududiy jamoalari bilan bellashish natijasida zarur bo'lgan medallar shodasini qo'lga kiritish hamyurtlarimiz uchun oson kechmayotganligi har bir bellashuvda yanada yorqinroq ko'rinib bormoqda.

Bugun, 31 iyul kungi bahslarda yurtimizning yunon-rum kurashi, engil atletika, taekvondo, suzish, stol tennisi vakillari chin manoda jasorat ko'rsatishdi. Yosh sportchilarimiz, ularning murabbiylari sovrinli o'rinlar uchun jon-jahdi bilan bellashganligini qo'lga kiritilgan 4ta oltin, 7ta kumush va 13ta bronzaning salmog'ida ham ko'rish mumkin. Bu Uzoq SHarqning quvonchi O'zbekistonga yaqinligidan darak berayotgandek.

Xususan, yosh klassik kurashchilarimizning 7 nafaridan 5 nafari, engil atletikachilarimizning 7 nafari, taekvodochilarimizning 4 nafari, gimnastikachilarimizning 5 nafari, suzish hamda stol tennisida 1 tadan sovrinli o'rinlarga ega chiqqanligi tahsinga loyiq natija bo'ldi.

Yoshlarimiz Vladivostokda o'tayotgan VII “Osiyo bolalari” o'yinlarining ayrim bahslarida qisman nohaqlikka uchraganligi, rossiyalik hakamlarning bazi vaziyatlarda o'z sportchilariga “elka tashlashlari”ni nazarda tutsak, yurtimiz yoshlari bundan-da yuksak natijalarga munosib deyishimizga barcha asoslarimiz etarli.

G'oliblik shohsupasiga ko'tarilgan kurashchimiz Husniddin Abdukarimov, engil atletikachimiz Rustam Abdullaev, taekvondochimiz Yodgorbek Zxuraboev, kumush medal egalari Amir Ishonxodjaev, Karina Karimova, Ruxshona Muhammadinova kabi iqtidorli farzandlarimiz O'zbek sportining kelajakdagi yorqin vakillari bo'lishiga shak-shubha yo'q. Yaratib berilayotgan shart-sharoitlar, imkoniyatlardan unumli foydalanilsa, murabbiylarimiz ilg'or tajriba asosida mashg'ulotlarda texnik-taktik usullarni qo'llashda davom etsa, yutuqlar o'z-o'zidan yuz ochaveradi.

Medallar sarhisobiga ko'ra, 20 tadan oshiq jamoalar orasida mamlakatimizning olovqalb sportchilari umumiy hisobda 30 dan oshiq medallar shodasiga ega bo'lgan holda kuchli beshlikda bo'lsa, davlatlar orasida Rossiyadan keyin 2-o'rinni band etib turibdi.

Alohida sport turlari orasida yurtimiz taekvondochilari 1-o'rinda, yunon-rum kurashchilari “Osiyo bolalari” o'yinlarini 2-o'rinda yakunlashdi.

Ertaga, 1 avgust kuni sportchilarimiz engil atletika, stol tennisi va sport kurashlarida medallar uchun bahsga kirishsa, basketbolchi qizlarimiz yarim finalda, yosh futbolchilarimiz saralash musobaqalarida qatnashadi.

Medallar jamg'arish reytingi quyidagicha ko'rinish olgan: